جئے پور : پنجاب سوپر کنگس کے ہیڈ کوچ رکی پانٹنگ نے دہلی کیپیٹلس کے خلاف شکست پر افسوس کا اظہار کیا ہے تاہم انہوں نے کہا کہ بحیثیت ٹیم اب پیر کو ممبئی انڈینس کے خلاف میچ پر توجہ دینے کی ضرورت ہے ۔ انہوں نے کہا کہ جئے پور میں منعقدہ مقابلہ ٹی 20 کرکٹ کے کھیل کی ایک بہترین مثال ہے ۔ اگر آپ کسی بھی مقابلہ میں قدرے تن آسانی کا شکار ہوجاتے ہیں تو آپ شکست کھا جاتے ہیں۔ انہوں نے کہا کہ کرکٹ کے تینوں شعبوں میں ٹیم نے قدرے تن آسانی سے کام لیا ہے ۔ پانٹنگ نے شریاس ائیر اور مارکس اسٹوئنس کی ستائش کی جنہوں نے بہترین بلے بازی کا مظاہرہ کیا تھا ۔ پانٹنگ نے بولنگ کے شعبہ میں ہرپریت برار کی بھی ستائش کی ۔ انہوں نے کہا بیٹنگ کرتے ہوئے ہم نے اچھی پارٹنرشپس نہیں بنائیں اور ہم اس سے بڑا اسکور بھی کرسکتے تھے ۔ انہوں نے نتیجہ پر مایوسی کا اظہار کیا تاہم کہا کہ کھلاڑیوں کو اب ممبئی انڈینس کے خلاف میچ پر توجہ دینے کی ضرورت ہے ۔ پنجاب کنگس کی ٹیم آئی پی ایل 2025 کے پلے آفس کیلئے پہلے ہی کوالیفائی ہوچکی ہے ۔ تاہم اسے دہلی کے خلاف شکست سے مشکلات کا سامنا بھی ہوسکتا ہے ۔ پانٹنگ نے کہا کہ ٹیم کو اب ممبئی انڈینس کے خلاف اپنی کارکردگی کو بہتر بنانے کی ضرورت ہے ۔
