واشنگٹن، یکم اکتوبر (یو این آئی) پنٹگان کی جانب سے عراق میں فوجی مشن کم کرنے کا اعلان کیا گیا ہے ۔ پنٹگان کی جانب سے جاری کیے گئے بیان میں کہا گیا ہے کہ آپریشنز کی منتقلی داعش کے خلاف جنگ میں کامیابی کا نتیجہ ہے ۔ دوسری جانب امریکی وزیرِ دفاع پیٹ ہیگسیتھ نے کہا ہے کہ امریکہ میں بھاری بھرکم موٹی توندوں والے جنرلز کا دور گیا، ترقیاں کوٹے پر نہیں میرٹ پر ہوں گی۔ انہوں نے مزید کہا کہ امریکی فوج میں داڑھی بڑھانے پر پابندی ہوگی، جو نئے ایجنڈے کی حمایت پر تیار نہیں ہیں وہ فوجی مستعفی ہو جائیں۔ ورجینیا میں میرین کور بیس میں جرنیلوں اور ایڈمرلز سے خطاب کے دوران پیٹ ہیگسیتھ کا کہنا تھا کہ احمق سیاسی رہنماؤں نے غلط سمت متعین کی اور امریکہ رستے سے بھٹک گیا۔
چینی انفلوئنسر کی ہیلی کاپٹر سے گرنے پر موت
بیجنگ، یکم اکتوبر (یو این آئی) چینی انفلوئنسر لائیو اسٹریم کے دوران سنگل سیٹ ہیلی کاپٹر گرنے سے اپنی جان گنوا بیٹھا۔ 55 سالہ چینی انفلوئنسر کی شناخت تانگ فیجی کے نام سے ہوئی ہے ، جو اپنا سنگل سیٹ ہیلی کاپٹر (الٹرا لائٹ کو ایکسیئل روٹر) اڑا رہا تھا جو کریش کرگیا۔ سوشل میڈیا پر شیئر کی جانے والی ویڈیوز میں دیکھا جاسکتا ہے کہ حادثہ کے بعد ہیلی کاپٹر زمین پر گرتا ہے اور اس میں آگ بھڑک جاتی ہے ۔