ورنگل پریس کلب میں وداعی تقریب کا اہتمام ۔پولیس کمشنر و صحافیوں کا خطاب
ورنگل ۔ورنگل پریس کلب کے زیر اہتمام پولیس کمشنر ڈاکٹر وشواناتھ رویندر کی ودائی تقریب کا انعقاد عمل میں لایا گیا ۔پریس کلب صدر سریدھر ریڈی نے پروگرام کی صدارت کی ۔اس موقع پر مختلف سینئر صحافیوں نے مخاطب کرتے ہوئے کہاکہ پولیس کمشنر رویندر کی خدمات نا قابل فراموش ہیں ۔بالخصوص لاک ڈائون کے دوران انہوںنے جو خدمات انجام دی ہیں اسے کبھی بھلایا نہیں جاسکتا ۔بہ حیثیت کمشنر بڑی ذمہ داری اور فرض شناسی کے ساتھ کئی ایک مسائل کی کامیاب یکسوئی انجام دی ۔اس موقع پر پولیس کمشنر رویندر نے کہاکہ انہوںنے تقریبا 27ماہ ورنگل میں خدمات کے دوران صحافیوں جو تعاون رہا وہ ناقابل فراموش ہے ۔واضح رہے کہ سبکدوش ہوئے کمشنر رویندر نے ورنگل میں خدمات کے دوران انمٹ نقوش چھوڑے ہیں ۔نرم مزاج دکھنے والے کمشنر ڈیوٹی پر سخت تھے ۔وشواناتھ رویندر نے لکچرر کی ملازمت کو خیر آباد کرتے ہوئے 1991میں گروپ ۔1میں کامیابی حاصل کرتے ہوئے ڈی ایس پی کے حیثیت سے اپنے کیرئیر کا آغاز کیا تھا ۔تلنگانہ ،آندھرا ،رائل سیما کے مختلف علاقوں میں خدمات انجام دیں ۔پہلے تینالی ،باپٹلہ ،گنٹور میں ڈی ایس پی کی حیثیت سے بعدازاں چتور میں اے ایس پی کی حیثیت سے ،کرنول میں او ایس ڈی کی حیثیت سے ،نلگنڈہ میں ڈی سی پی ،وشاکھا پٹنم میں انٹیلجنس ایس پی ،تروپتی میں اربن ایس پی ،کریم نگر میں ایس پی ،حیدر ایسٹ زون ڈی سی پی بعد ازاں حیدر آباد جائنٹ کمشنر ( ٹرافک)میں خدمات انجام دینے کے بعدمارچ 2018میں ورنگل میں دوسرے پولیس کمشنر کی حیثیت سے نمایاں خدمات انجام دیں ۔ریاست بھر میں ہلچل پیدا کرنے والے کیسوں کی یکسوئی میں نمایاں خدمات انجام دیں ۔ہنمکنڈہ کمار پلی مارکٹ علاقہ 9ماہ کی لڑکی کی عصمت دری اور قتل کے کیس میں تیزی پیدا کرتے ہوئے اندرون ایک ماہ کورٹ میں پھانسی کی سزا دلائی لیکن بعد ازاں اسے عمر قید میں تبدیل کیا گیا ۔ورنگل رورل ضلع کے گورے کنٹہ میں 9افراد کو نشہ کی ادویات کھلا کر بائولی میں پھینک دینے والے کیس میں ملزم میں 72گھنٹوں میں نشاندہی کرکے اسے گرفتار کرلیا گیا ۔اسی طرح کورونا کے انسداد کے لئے لاک ڈائون کے دوران جو خدمات انجام دی حکومت کی جانب سے ستائش کی گئی۔کمشنر نے پولیس ملازمین کی فلاح کے لئے بہترین خدمات انجام دیں ۔سکریٹری پریس کلب نے شکریہ ادا کیا ۔قبل ازیں صحافیوں کی جانب سے کمشنر کی کثرت سے گلپوشی اور شال پوشی انجام دی گئی ۔اس موقع پر سینئر صحافی پنا شیوا کمار ،مدھو ،امر ،سریدھر ،وحید گلشن ،سرینواس ،اکبر ضیاء ،ایم اے نعیم ،علیم دانش ، اور دیگر صحافی موجود تھے ۔