نئی دہلی ۔ آسٹریلیائی سابق کپتان رکی پونٹنگ نے ہندوستانی کرکٹ ٹیم کی کوچنگ سے انکار کردیا۔ بورڈ نئے کوچ کی تلاش میں ہے، رکی پونٹنگ سے آئی پی ایل کے دوران کوچنگ کے لیے رابطہ کیا گیا اور پونٹنگ نے رابطوں کی تصدیق کی ہے۔ اس حوالے سے رکی پونٹنگ نے کہا ہے کہ میں نے کوچنگ کے حوالے سے کئی رپورٹس دیکھی ہیں، ایسا عموماً سوشل میڈیا پر ہوتا ہے اور کئی نام سامنے آتے ہیں۔انہوں نے کہا کہ میری آئی پی ایل کے دوران چھوٹی موٹی اس حوالے سے گفتگو ہوتی رہی ہے، گفتگو میں میری کوچنگ میں دلچسپی جاننے کی کوشش کی گئی، میں قومی ٹیم کی کوچنگ کرنا پسند کروں گا لیکن زندگی میں اور بھی بہت کچھ ہے۔ رکی پونٹنگ کے بموجب میں گھر میں افراد خاندان کے ساتھ وقت گزارنا چاہتا ہوں۔ نیز ہندوستانی ٹیم کے اگر آپ کوچ ہوں گے تو پھر آپ آئی پی ایل میں کوچ نہیں ہوسکتے، نیشنل ٹیم کا کوچ ہونے کا مطلب سال میں 10، 11 ماہ کی ملازمت ہے۔ سابق کپتان نے کہا کہ یہ اس وقت میرے طرززندگی کے مطابق نہیں ہے، زندگی میں لطف اندوز ہونے کے لیے ابھی بہت کچھ ہے، مجھے علم ہے جسٹن لینگر، اسٹیفن فلیمنگ اورگوتم گھمبیر کے نام بھی کوچنگ کے لیے سامنے آئے ہیں۔ میری افراد خاندان نے آئی پی ایل کے دوران 5 ہفتے میرے ساتھ ہندوستان میں گزارے، میں نے بیٹے کو کوچنگ کی پیشکش کی اطلاع دی تو بیٹے نے اسے قبول کرنے کو کہا، بیٹا کہنے لگا کہ ہم دو سال کے لیے یہاں منتقل ہو جائیں گے۔ رکی پونٹنگ نے کہا کہ میرے خاندان کو ہندوستان میں کرکٹ کلچر اچھا لگتا ہے لیکن اس وقت کوچنگ میرے لائف اسٹائل میں فٹ نہیں ہوتی۔
