حیدرآباد۔ پٹرول، ڈیزل اور گھریلو پکوان گیس کی قیمتوں میں غیر معمولی اضافہ کے خلاف سی پی آئی ایم کی جانب سے حیدرآباد میں احتجاج کیاگیا۔شہر کے آرٹی سی چوراہے پر کئے گئے اس احتجاج میں پارٹی کارکنوں اور لیڈروں کی بڑی تعداد نے حصہ لیاجنہوں نے قیمتوں میں اچانک غیرمعمولی اضافہ کو عام آدمی کی جیب پر ایک نیا بوجھ قراردیتے ہوئے اضافی شدہ قیمتوں کو فوری واپس لینے کامطالبہ کیا اور حکومت کے خلاف نعرے بازی کی۔پارٹی کے لیڈروں اور کارکنوں نے علامتی گیس سلنڈرس،پلے کارڈس کے ساتھ یہ احتجاج کیا۔سی پی آئی ایم کے ریاستی سکریٹری ٹی ویرابھدرم نے اس موقع پر میڈیا سے بات کرتے ہوئے کہاکہ اس اضافہ سے عام آدمی پر کافی بوجھ پڑا ہے ۔اضافی شدہ قیمتوں کو مودی حکومت فوری طورپرواپس لے ۔انہوں نے انتباہ دیتے ہوئے کہاکہ اگر قیمتوں میں کمی نہیں کی گئی تو دیگر جماعتوں کے ساتھ مل کر تحریک چلائی جائے گی اور پٹرول پمپس کے ساتھ ساتھ سرکاری دفاتر کامحاصرہ کیاجائے گا۔انہوں نے کہاکہ ہم سے حکومت کی جانب سے جو وعدہ کیا گیا تھا اس کے مطابق بین الاقوامی سطح پر خام تیل کی قیمت میں کمی پر یہاں پر کمی اور اضافہ پر یہاں اضافہ کی بات کہی گئی تھی،بین الاقوامی سطح پر خام تیل کی قیمت میں کمی کے مطابق دیکھاجائے تو ملک میں پٹرول کی قیمت 30تا 40روپئے ہی ہونا چاہئے تاہم دھوکہ دہی کے ذریعہ عوام پر بوجھ ڈالتے ہوئے مرکزی حکومت قیمتوں میں اضافہ کررہی ہے ۔کسی بھی ملک میں پٹرول اور ڈیزل کی قیمت اس طرح نہیں ہے ۔احتجاجیوں نے حکومت کے اچھے دن کا تمسخر بھی اڑایا اور اپنے ساتھ کارٹونس بھی لائے جس میں گیس کی قیمتوں میں اضافہ کا مذاق اڑایا گیا۔