کراچی ۔17 مارچ (سیاست ڈاٹ کام)کورونا وائرس کے تیزی سے پھیلنے کے باعث پاکستان کرکٹ بورڈ کی جانب سے پی ایس ایل سیمی فائنل اور فائنل میچ کی معطلی کا اچانک فیصلہ سامنے آیاجس کا موجودہ وسابق کھلاڑی خیر مقدم کر رہے ہیں۔ پاکستان سوپر لیگ سیزن فائی میں ملتان سلطانز کی نمائندگی کرنے والے شاہد آفریدی نے کہا کہ پی ایس ایل ملتوی کرنے کا فیصلہ بہت پہلے کرنا چاہیے تھا۔اپنے سوشل میڈیا پیغام میں انہوں نے لکھا کہ پی ایس ایل کے اختتام پر انہیں افسوس ہورہا ہے، لیکن یہ فیصلہ تمام متعلقہ افرادکی صحت کی حفاظت کے لئے ازحد ضروری تھا۔ انہوں نے کہا کہ ٹرافی ٹیبل پر پہلا مقام پر پہنچنے والی ٹیم کو ملنی چاہئے۔ یہاں یہ بات قابل ذکر ہے کہ پی سی بی نے فوری طور پر سیمی فائنل اور فائنل میچز معطل کئے ہیں منسوخ نہیں کئے۔ پی سی بی کے مطابق معطل شدہ میچز ری شیڈول ہوں گے۔ لاہور قلندرز کے سینئر کھلاڑی محمد حفیظ نے اپنے سوشل میڈیا پیغام میں لکھا کہ پی ایس ایل ملتوی کرنے کا فیصلہ اچھا ہے، صحت اور جان سے بڑھ کرکچھ نہیں۔ سی ای او لاہور قلندرزعاطف رانا نے کہا کہ پوری دنیا میں کورونا کی وبا پھیلی ہے،اس سے حفاظت ضروری ہے،پی سی بی نے پی ایس ایل ملتوی کرنے کا ٹھیک فیصلہ کیا ہے۔ دوسری جانب رمیز راجا نے میڈیا سے گفتگو کرتے ہوئے کہا کہ انگلش کرکٹر ایلکس ہیلز لندن میں کورونا وائرس ٹسٹ کروا رہے ہیں، شاید ایلکس ہیلز میں کورونا وائرس کی کچھ علامات سامنے آئی ہیں۔ پی ایس ایل فائی میں ایلکس ہیلز نے کراچی کنگز کی نمائندگی کی۔ پی ایس ایل کی فرنچائز پشاور زلمی کے چیئر مین جاوید آفریدی نے اپنے ٹوئٹ میں پی سی بی کے فیصلے کو سراہا۔ جاوید آفریدی نے اپنے ٹوئٹ میں لکھا کہ کورونا وائرس جیسی قدرتی آفت سے جہاں پوری دنیا نبرد آزماء ہے وہاں حکومت پاکستان بھی عمران خان کی قیادت میں اس وباء سے نمٹنے کے لئے میدان عمل میں ہے۔
