نیویارک : اقوام متحدہ کے سکریٹری جنرل انٹونیو گوٹیرس نے خبردار کیا ہے کہ دنیا کے چار ممالک میں قحط کا شدید خطرہ ہے۔ سلامتی کونسل کے ارکان کو لکھے اپنے ایک خط میں گوٹیرس نے لکھا کہ کانگو، یمن، نائجیریا اور جنوبی سوڈان میں ممکنہ قحط کی وجہ سے لاکھوں افراد کی زندگیاں خطرے میں ہیں۔ یمن تقریبا 10 سال سے شیعہ باغیوں کے سبب داخلی خلفشار سے دوچار ہے اور دن بہ دن ملکی حالات ابتر ہورہے ہیں ۔سکریٹری جنرل کے مطابق ان ملکوں کی مدد کے لیے دستیاب فنڈز انتہائی محدود ہیں اور اس ضمن میں فوری کارروائی درکار ہے۔ گوٹیرس نے صومالیہ، برکینا فاسو اور افغانستان کی صورتحال پر بھی تشویش ظاہر کی۔ انہوں نے اقوام متحدہ کی گلوبل رپورٹ آن فوڈ کرائسس کے تجزیے کی بنیاد پر یہ اتنباہ جاری کیا۔
