ممبئی : سابق کرکٹرسنیل گواسکر نے آئی سی سی چیمپئنز ٹرافی میں پاکستان کو فیورٹ قرار دیا ہے۔ ایک انٹرویو میں سابق کیپٹن گواسکر نے کہا کہ پاکستان کو اپنے میدانوں پر کھیلنے کا خاطر خواہ فائدہ ہوگا۔ اس ٹورنامنٹ کیلئے میزبان ملک پاکستان کو فیورٹ سمجھا جانا چاہیے کیونکہ اپنے وطن میں کسی بھی ٹیم کو شکست دینا ہمیشہ مشکل ہوتا ہے۔ گواسکر نے کہا کہ 2023ء کے ونڈے ورلڈ کپ میں ہندوستانی ٹیم نے شاندار کھیل کا مظاہرہ کیا۔ بھارت فائنل میں ہار گیا مگر اس سے پہلے ایونٹ میں بھارتی ٹیم نے مسلسل 10 میچز جیت کر اپنی طاقتور پوزیشن ثابت کی تھی۔ واضح رہے کہ چمپئنز ٹرافی 2025 پاکستان اور یو اے ای میں مقرر ہے۔ ایونٹ کا آغاز 19 فروری کو کراچی میں پاکستان اور نیوزی لینڈ کے میچ سے ہوگا۔
