کانپور: اتر پردیش کے امیٹھی باشندہ محمد عارف اور سارس کی دوستی ایک بار پھر سرخیوں میں ہے۔ عارف ایک بار پھر کانپور کے چڑیاگھر پہنچے جہاں اس کے دوست سارس کو رکھا گیا ہے۔ عارف بہت خاموشی کے ساتھ چڑیاگھر پہنچے اور پھر سارس سے ہوئی ملاقات کی ویڈیو سوشل میڈیا پر ڈالی جو کہ وائرل ہو گئی ہے۔ عارف بغیر کسی کو بتائے ٹکٹ لے کر سارس سے ملنے پہنچے، لیکن اب جب اس کی خبر چڑیاگھر کے انتظامیہ کو ملی تو وہ ناراض نظر آ رہے ہیں۔ عارف سے پہلے ہی افسروں نے کہا تھا کہ ان کا سارس سے اب زیادہ ملنا مناسب نہیں ہے، کیونکہ ایسا کرنے سے وہ باڑے کے باہر آنا چاہے گا۔ ویڈیو میں دیکھا جا سکتا ہے کہ عارف کو دیکھتے ہی سارس خوشی سے جھومنے لگا اور باڑے میں ہی پنکھ پھیلا کر خوشی کا اظہار کیا۔ تقریباً 5 منٹ کی ملاقات کے دوران سارس عارف سے باڑے کے باہر ملنے کو بے تاب نظر آیا۔ ایسا لگ رہا تھا جیسے عارف کا ساتھ پانے کیلئے سارس بے قرار ہے۔ اتنے دنوں بعد بھی عارف کو دیکھ کر سارس کی خوشی دیکھتے بنتی ہے۔بتایا جاتا ہے کہ کانپور چڑیاگھر میں تین ماہ سے باڑے میں رکھے گئے سارس سے ملنے کیلئے عارف بغیر بتائے خاموشی کے ساتھ وہاں پہنچ گئے۔ عارف نے چڑیاگھر پہنچتے ہی ماسک لگا لیا تھا تاکہ کوئی پہچان نہ سکے۔ انھوں نے پارکنگ میں پہنچ کر اپنی گاڑی کھڑی کی اور ٹکٹ لے کر اندر چلے گئے۔ اس کی ذرا بھی خبر چڑیاگھر کے افسروں کو نہیں ہوئی۔ بعد میں جب انتظامیہ کو سوشل میڈیا سے جانکاری ملی تو انھوں نے بھی سی سی ٹی وی کھنگالا اور معاملہ کی تصدیق ہوئی ۔
