جگدل پور/رائے پور، 5 اپریل (یو این آئی) چھتیس گڑھ کے بستر ڈویژنل ہیڈ کوارٹر جگدل پور میں ہفتہ کی دیر رات زلزلے کے ہلکے جھٹکے محسوس کیے گئے ۔موصولہ اطلاع کے مطابق دیر رات 11:32 بجے آئے زلزلے کی شدت ریکٹر اسکیل پر 4.4 ماپی گئی ہے اور اس کی گہرائی تقریباً پانچ کلومیٹر بتائی جا رہی ہے ۔ زلزلے کا مرکز اڈیشہ کے کورا پٹ علاقے میں رات 11:31 بجے درج کیا گیا، جس کے اثر سے چھتیس گڑھ کے جنوبی حصوں سمیت جگدل پور اور آس پاس کے علاقوں میں ہلکے جھٹکے محسوس کیے گئے ۔بین الاقوامی زلزلے کے اعداد و شمار کے مطابق حالیہ عرصے میں جنوبی ایشیا کے خطے میں ہلکی سے درمیانی شدت کے زلزلے درج کیے جا رہے ہیں۔ ایک رپورٹ میں نیپال کے علاقے کے قریب بھی زلزلے کی سرگرمی درج کی گئی، جس میں جھٹکوں کا مرکز کاکیناڈا سے 179 کلومیٹر شمال، راجمندری سے 192 کلومیٹر شمال-شمال مشرق، برہم پور سے 249 کلومیٹر مغرب-جنوب مغرب اور رائے پور سے تقریباً 313 کلومیٹر جنوب-جنوب مشرق کی سمت میں بتایا گیا۔ اس سے اشارہ ملتا ہے کہ انڈین پلیٹ اور آس پاس کے علاقوں میں زمینی ہلچل برقرار ہے ۔محکمہ موسمیات بستر میں تعینات ماہرِ موسمیات ایچ پی چندرا نے بتایا کہ زلزلے اور موسم کا آپس میں کوئی تعلق نہیں ہے ۔زلزلے سے فی الحال کسی قسم کے جانی یا مالی نقصان کی کوئی اطلاع نہیں ہے ۔((G/W)
