ملک بھر میں راشن کارڈ پر چاول کی سربراہی کا مشورہ ، تلنگانہ کے دیرینہ حل طلب امور کی یکسوئی کی درخواست
حیدرآباد ۔ 20۔نومبر (سیاست نیوز) چیف منسٹر ریونت ریڈی نے مرکزی وزیر کنزیومر افیرس اور عوامی نظام تقسیم پراہلاد جوشی ملاقات کی اور ریاست میں سیول سپلائیز ڈپارٹمنٹ کی اسکیمات سے واقف کرایا۔ انہوں نے تلنگانہ کی طرح عوام کو ملک بھرمیں باریک چاول کی مفت سربراہی کی تجویز پیش کی۔ انہوں نے مرکزی وزیر سے دھان کی خریدی کے سلسلہ میں زیر التواء بقایہ جات کی ادائیگی ، دھان کی خریدی کے نشانہ میں اضافہ اور دیگر امور پر توجہ مبذول کرائی۔ وزیر سیول سپلائیز اتم کمار ریڈی ، چیف سکریٹری رام کرشنا راؤ ، پرنسپل سکریٹری برائے چیف منسٹر شیشادری اور پرنسپل سکریٹری سیول سپلائیز اسٹیفن رویندرا اس موقع پر موجود تھے۔ ملاقات کے دوران چیف منسٹر نے راشن کارڈ پر عوام کو مفت باریک چاول کی سربراہی اسکیم پر کامیابی سے عمل آوری کی تفصیلات سے واقف کرایا۔ انہوں نے کہا کہ ملک کی کسی بھی ریاست میں اس طرح کی اسکیم نہیں ہے ۔ انہوں نے کہا کہ اسکیم کے نتیجہ میں اوپن مارکٹ میں چاول کی قیمت میں کمی واقع ہوئی ہے۔ انہوں نے مرکزی حکومت کی جانب سے ملک کی دیگر ریاستوں میں غریبوں کو مفت چاول کی سربراہی کی تجویز پیش کی۔ انہوں نے کہا کہ مرکزی حکومت سے 1468 کروڑ کی سبسیڈی کی ادائیگی باقی ہے۔ چیف منسٹر نے عوامی نظام تقسیم کو مزید بہتر بنانے کیلئے دھان کی خریدی کے نشانہ میں اضافہ کی اپیل کی۔ مرکزی وزیر نے چیف منسٹر کی تجاویز پر مثبت ردعمل کا اظہار کیا۔ انہوں نے ملک بھر میں عوامی نظام تقسیم کے لئے مرکز کے اقدامات سے واقف کرایا۔ وزیر سیول سپلائیز اتم کمار ریڈی نے دھان کی خریدی کا نشانہ 80 لاکھ میٹرک ٹن مقرر کرنے کی درخواست کی ۔1
