بیجنگ: چین نے امریکہ کو مغربی شہر چینگڈو میں قائم اپنا قونصل خانہ بند کرنے کا حکم دیا ہے۔چین کا یہ اقدام ایسے موقع پر سامنے آیا ہے جب امریکہ نے منگل کو ہیوسٹن میں چینی قونصل خانہ تین روز کے اندر بند کرنے کا حکم دیا تھا۔چین کی وزارتِ خارجہ نے جمعہ کو جاری ایک بیان میں کہا ہے کہ امریکہ کے غیر منصفانہ اقدام کے خلاف چین نے جائز اور ضروری قدم اٹھایا ہے۔دونوں ملکوں کے درمیان سفارتی تعلقات شدید کشیدگی کا شکار ہیں۔امریکہ اور چین کے درمیان تجارت، کورونا وائرس سے نمٹنے کے لیے کیے جانے والے اقدامات، جاسوسی کے الزامات، ہانگ کانگ میں نئے سیکیورٹی قانون کے نفاذ اور چین کے ایغور مسلمانوں کے حقوق کے معاملے پر دونوں ملکوں میں کشیدگی پائی جاتی ہے۔چین کی وزارتِ خارجہ کے بیان کے مطابق امریکہ اور چین کے درمیان موجودہ تعلقات کی صورتِ حال وہ نہیں جس کی چین خواہش رکھتا ہے اور اس تمام تر صورتحال کا ذمہ دار امریکہ ہے۔ بیان میں مزید کہا گیا ہے کہ امریکہ پر ایک مرتبہ پھر زور دیا جاتا ہے کہ وہ اپنے ‘غلط فیصلوں’ پر نظر ثانی کرے اور دوطرفہ بات چیت کی بحالی کے لیے ضروری اقدامات کرے۔
