نئی دہلی، 5مئی (سیاست ڈاٹ کام) دہلی گڈس ٹرانسپورٹ آرگنائزیشننے راجدھانی میں ڈیزل کی قیمتوں میں اضافہ کی سخت مذمت کرتے ہوئے کہا کہ اس اضافہ کو فوری طورپر واپس لیا جائے ۔دہلی حکومت نے ڈیزل پر ویٹ 16.75فیصد سے بڑھاکر 30فیصد کردیا ہے جس سے راجدھانی میں یہ ایندھن منگل سے 7.10روپے مہنگا ہوکر 69.29روپے فی لیٹر ہوگیا۔ ڈیزل کی قیمت اب ملک کے چار بڑے شہروں میں سب سے زیادہ ہوگئی ہے ۔دہلی گڈس ٹرانسپورٹ آرگنائزیشن کے صدر راجندر کپور نے ڈیزل کی قیمت میں اضافہ کی تنقید کرتے ہوئے اسے فوری طورپر واپس لینے کی مانگ کی۔مسٹر کپور نے کہا کہ ہم ٹرانسپورٹر کورونا وائرس کے اس مشکل وقت میں اپنی اور اپنے ملازمین کی جان کی پرواہ کئے بغیر ریاست میں کسی چیز کی کمی نہ ہواس کے لئے دن رات کام کررہے ہیں اس کا یہ انعام ملے گا اس پر یقین نہیں ہوپارہا ہے ۔انہوں نے کہا کہ ڈیزل کی قیمت میں ایک بار میں اتنے اضافہ سے یقینی طورپر روز مرہ کی ضروری چیزوں کی قیمتوں میں بھاری اچھال آئے گا اور عام لوگوں پر اس کا برا اثر پڑے گا۔ممبئی میں ڈیزل کی قیمت 66.21، کولکتہ میں 65.22اور چینائی میں 68.22روپے فی لیٹر ہے ۔