نئی دہلی: صدر کانگریس سونیا گاندھی کو کورونا سے متعلق پریشانیوں کے سبب دہلی کے گنگا رام ہاسپٹل میں داخل کرایا گیا ہے۔ کانگریس لیڈر رندیپ سنگھ سرجے والا نے اس کی اطلاع دی۔ فی الحال ان کی حالت مستحکم ہے۔ خیال رہے کہ سونیا گاندھی حال ہی میں کورونا سے متاثر ہوئی تھیں، جس کے بعد وہ روبہ صحت ہو رہی تھیں لیکن آج دقت پیش آنے کے سبب انہیں اسپتال میں داخل کرایا گیا۔ انہیں نگہداشت کے لئے اسپتال میں رکھا گیا ہے۔غورطلب ہے کہ اس ماہ کے شروع میں کانگریس صدر سونیا گاندھی کورونا وائرس سے متاثر پائی گئی تھیں۔ اس بارے میں جانکاری دیتے ہوئے پارٹی نے کہا تھا کہ گاندھی اپنی رہائش گاہ پر ہی تنہائی میں زیر علاج ہیں۔ اس کے ساتھ ہی پارٹی صدر نے ان تمام لوگوں سے اپنی جانچ کرانے کی اپیل کی تھی جو ان کے رابطے میں آئے تھے۔
