ممبئی ۔ 5؍جنوری ( ایجنسیز ) فلم ساز اور پروڈیوسر کرن جوہر اپنے بڑے اسکرین پراجکٹ ’کبھی خوشی کبھی غم 2‘ کی ریلیز کی تیاری کر رہے ہیں۔ میڈیا رپورٹس کے مطابق دعویٰ کیا جارہا ہے کہ کرن جوہر نے اس متوقع فلم کیلئے اسکرپٹ فائنل کرلی ہے۔ یہ پراجکٹ ان کی اب تک کی سب سے بڑی فلم ثابت ہونے جارہی ہے اور یہ 2001 کی ہٹ فلم ’کبھی خوشی کبھی غم‘ کے جذباتی اور خاندانی ماحول کو بنیاد بنائے گی جس میں شاہ رخ خان، کاجول، کرینہ کپور، ہرتیک روشن، امیتابھ بچن، جیا بچن اور دیگر نے اہم کردار ادا کیے تھے۔ میڈیا کے مطابق ذرائع نے بتایا کہ کرن جوہر دوبارہ خاندانی ڈرامہ کی دنیا میں قدم رکھ رہے ہیں۔فلم خاندانی ڈرامہ ہوگی جس کا مرکزی حصہ رومانوی اور جذباتی ہوگا۔ فلم میں دو مرکزی ہیروز اور دو مرکزی ہیروئین کا کردار ہوگا اور کاسٹنگ کا عمل جلد شروع ہونے کی توقع ہے۔اطلاعات کے مطابق کرن جوہر کی یہ فلم 2026 میں ریلیز کی جائے گی۔