نئی دہلی: بارش کے بعد مچھروں کی افزائش کی روک تھام اور راجدھانی میں ڈینگو پر قابو پانے کے لئے وزیراعلیٰ اروند کجریوال نے اتوار کے روز دس ہفتہ دس بجے دس منٹ کی مہم کی شروعات کی۔ گزشتہ سال کی طرح ہی وزیراعلیٰ نے آج صبح دس بجے اپنی سرکاری رہائش گاہ پر صاف۔صفائی کرکے اس مہم کی شروعات کی۔ وزیراعلیٰ نے کہا کہ اس مہم کے ذریعہ دہلی سرکار کی کوشش راجدھانی کو ڈینگو اور چکن گونیا جیسی بیماریوں سے ہمیشہ کے لئے پاک کرانا ہے ۔ انہوں نے دہلی کے لوگوں سے اپیل کی ہے وہ خود بھی اس مہم سے جڑیں اور اپنے دس اور دوستوں اور رشتہ داروں کو بھی ساتھ میں شامل کریں۔ انہوں نے کہا کہ بارش کے بعد ڈینگو مچھروں کی افزائش کا امکان بڑھ جاتا ہے ۔ مچھروں کی افزائش پر قابو پانے کے لئے گھروں میں پانی جمع کرکے نہ رکھیں اور آس پاس بھی ایسا نہ ہونے دیں۔ اس مہم کو کیجریوال کابینہ کے وزرا، سبھی اراکین اسمبلی اور حکام ہر اتوار کو اپنے گھر میں چلائیں گے ۔
