بنگلورو۔ 25 ؍ ڈسمبر (ایجنسیز) کرناٹک کے چتردرگا ضلع میں جمعرات کی صبح ایک المناک سڑک حادثے میں 12 سے زیادہ افراد زندہ جل گئے جس سے علاقے میں افرا تفری مچ گئی۔ بتایا جاتا ہے کہ ہیریور تعلقہ کے گورلاتو علاقے میں ایک پرائیویٹ سلیپر بس اور ٹرک میں زبردست ٹکر ہوئی جس کے بعد دونوں گاڑیوں میں بھیانک آگ لگ گئی اور مسافر اندر پھنس گئے۔پولیس کے مطابق یہ حادثہ چہارشنبہ اور جمعرات کی درمیانی شب 12 بجے کے قریب پیش آیا۔ پرائیویٹ سلیپر بس بنگلورو سے گوکرنا جا رہی تھی تبھی راستے میں سامنے سے آرہے ٹرک نے ٹکر مار دی۔ حادثے میں ٹرک کا کچھ حصہ بھی جل گیا ڈرائیورکی موقع پر ہی موت ہوگئی۔ بس میں ڈرائیور اور کنڈکٹر سمیت کل 32 افراد سوار تھے۔گاڑیوں کی ٹکر اتنی بھیانک تھی کہ بس اور ٹرک دونوں میں آگ لگ گئی۔ آگ کے تیزی سے پھیلنے کے باعث متعدد مسافر بس کے اندر ہی پھنس گئے اور انہیں باہر نکلنے کا موقع نہیں مل پایا جس سے ان کی موقع پرالمناک موت واقع ہو گئی۔ حادثے کی اطلاع ملتے ہی ڈی ایس پی شیوکمار جائے وقوعہ پر پہنچے اور امدادی کارروائیوں کی نگرانی کی۔ مقامی لوگوں اور فائر بریگیڈ کے عملے کی مدد سے آگ پر قابو پایا گیا۔زخمی مسافروں کو ابتدائی طور پر چتردرگ ضلع ہاسپٹل لیجایا گیا ہے۔ ان میں سے دو شدید زخمی ہیں اور انہیں مزید علاج کیلئے بنگلور ریفر کر دیا گیا ہے۔ پولیس نے مقدمہ درج کر لیا ہے اور حادثہ کی وجوہات کی جانچ کر رہی ہے۔ ابتدائی تحقیقات میں تیزرفتاری یا غفلت کا پتہ چلتا ہے حالانکہ سرکاری طور پرتصدیق تحقیقات مکمل ہونے کے بعد ہی کی جائے گی۔ وزیراعظم مودی اور دیگر قائدین نے افسوس کا اظہار کیا ۔ چیف منسٹر کرناٹک سدارامیا نے ایکس گریشیاء کا اعلان کیا۔