تقریبا 70افرادزخمی،دو کی حالت تشویشناک
حیدرآباد13اکتوبر (یو این آئی) آندھرا پردیش میں لاٹھیوں کی لڑائی میں تقریبا70افراد زخمی ہوگئے ۔ہر سال دسہرہ کے موقع پر اے پی کے کرنول ضلع کے ہولاگونڈا علاقہ میں مندر کے قریب لاٹھیوں کی روایتی لڑائی ہوتی ہے جس میں ہزاروں افراد شرکت کرتے ہوئے ایک دوسرے پر لاٹھیوں سے حملہ کرتے ہیں۔اس میں کئی افراد ہر سال زخمی ہوتے ہیں۔ کل شب بارش کے سبب تاخیر سے شروع ہوئی اس لاٹھیوں کی لڑائی میں تقریبا70افراد زخمی ہوگئے جن میں دو کی حالت تشویشناک بتائی جاتی ہے ۔ان کو علاج کے لئے مقامی طورپر لگائے گئے طبی کیمپ منتقل کیاگیا۔ لاٹھیوں کی لڑائی کی تقریب مندر کے قریب ہر سال منعقد کی جاتی ہے ۔اس کو بنی فیسٹیول کہا جاتا ہے ۔کئی صدیوں سے اس لاٹھیوں کی لڑائی کی روایت اس علاقہ میں چلی آرہی ہے ۔اس پر پابندی کے قواعد اور کورونا کے اصول نظرانداز کرتے ہوئے اس کا اہتمام جاریہ سال بھی کیاگیا۔کرنول کے دیورگُٹہ میں جاترا کے موقع پر یہ لاٹھیوں کی لڑائی منعقد کی جاتی ہے۔پولیس کی جانب سے اس فیسٹیول کے سلسلہ میں انتظامات کئے گئے تھے ۔اس موقع پر ٹریفک جام کی صورتحال بھی پیدا ہوگئی۔
