کھیل اور سیاست علیحدہ ہیں ‘ پاکستان کا موقف: وزارت خارجہ
اسلام آباد : حکومت پاکستان نے قومی ٹیم کو کرکٹ ورلڈکپ کیلئے ہندوستان جانے کی اجازت دے دی۔ ترجمان دفتر خارجہ کے مطابق پاکستان کا ہمیشہ مؤقف رہا ہے کہ کھیل اور سیاست علیحدہ ہیں اور پاک۔ہند تعلقات انٹرنیشنل اسپورٹس کی راہ میں حائل نہیں ہونے چاہیے۔ دفتر خارجہ کا کہنا تھاکہ پاکستان کو ہندوستان میں سکیورٹی پر تحفظات برقرار ہیں، آئی سی سی اور ہندوستانی حکومت کو تحفظات سے آگاہ کریں گے۔دفتر خارجہ نے کہاکہ امید ہے ہندوستان میں پاکستانی ٹیم کو مکمل سکیورٹی حاصل ہوگی۔ ترجمان کے مطابق پاکستان کا فیصلہ تعمیری اور ذمہ دارانہ رویہ کا عکاس ہے، ہندوستان نے ایشیا کپ کے لیے اپنی کرکٹ ٹیم کو پاکستان بھیجنے سے انکار کر دیا تھا۔خیال رہے کہ گزشتہ دنوں وزیر خارجہ بلاول بھٹو زرداری کی زیرِ صدارت قومی ٹیم کے دورہ ہند کے حوالے سے کمیٹی کا اہم اجلاس ہوا تھا۔ یہ اجلاس پی سی بی کے خط کے بعد ہوا تھا جس میں ہندوستان میں ہونے والے ورلڈکپ میں قومی ٹیم کی شرکت کی اجازت مانگی گئی تھی۔ آئی سی سی ورلڈ کپ 5 اکتوبر سے ہندوستان میں کھیلا جائیگا اور پاکستان اپنا پہلا میچ نیدرلینڈز کے خلاف 6 اکتوبر کو کھیلے گا۔ شیڈول کے مطابق پاکستان اور انڈیا کا میچ 15 اکتوبر کو احمد آباد میں ہوگا۔