نیہ دہلی، 11 ستمبر (یو این آئی) ایران کے صدر مسعود پیزشکیان نے جمعہ کو یہاں کہا کہ کسی ملک کی تجارت، توانائی، بنیادی ڈھانچے یا مالی نظام پر فوجی یا سیاسی دباؤ کا اثر اس کی سرحدوں سے کہیں آگے تک جا سکتا ہے اور اس سے علاقائی اور عالمی استحکام متاثر ہو سکتا ہے ۔مسٹر پیزشکیان برکس چوٹی کانفرنس کے سلسلے میں ہندوستان آئے ہوئے ہیں اور انہوں نے شام کو وزیر اعظم نریندر مودی کے ساتھ دو طرفہ ملاقات سے پہلے یہاں برکس بزنس فورم سے خطاب کیا۔ وہاں مسٹر مودی اور روس کے صدر ولادیمیر پوتن بھی موجود تھے ۔ ان کے اس بیان کو ایران کے جوہری پروگرام پر اس کے خلاف امریکہ کی فوجی اور تجارتی کارروائی (اقتصادی پابندیوں) کے تناظر میں دیکھا جا رہا ہے ۔ایران کے صدر نے اس پس منظر میں برکس سے ایسی مضبوط اور مستحکم اقتصادی صلاحیتیں تیار کرنے کی اپیل کی، جو کسی بھی ملک کو مالی ذرائع یا ٹیکنالوجی پر اجارہ داری قائم کرکے کسی دوسرے رکن ملک کی جائز تجارت میں رکاوٹ ڈالنے سے روک سکیں۔مسٹر پیزشکیان نے کہا کہ یہ دور عالمی معیشت کے سب سے پیچیدہ ادوار میں سے ایک ہے ۔ اس دور کی خصوصیت جغرافیائی سیاسی غیر یقینی صورتحال، رسد کی زنجیر میں خلل اور سیاسی دباؤ ڈالنے کے لیے بڑے پیمانے پر اقتصادی پابندیوں کے استعمال سے ہے ۔فروری 2026 میں تنازع شروع ہونے کے بعد پیزشکیان کا یہ پہلا ہندوستان کا دورہ ہے ۔تنازع کے اثرات کا براہ راست ذکر کرتے ہوئے انہوں نے کہا کہ ایران برسوں سے وسیع پابندیوں کا سامنا کر رہا ہے ، لیکن حال ہی میں یہ دباؤ ایک ”کہیں زیادہ خطرناک مرحلے ” میں داخل ہوگیا ہے ۔انہوں نے امریکہ اور اسرائیل کو ایران کے خلاف جارح قرار دیتے ہوئے کہا کہ ”اس جارحیت نے انسانی اور مادی نقصان پہنچانے کے ساتھ ساتھ ایک بار پھر ایک اہم حقیقت کو اجاگر کیا ہے کہ اقتصادی سلامتی کو قومی اور علاقائی سلامتی سے الگ نہیں کیا جا سکتا۔” انہوں نے کہا کہ برکس کو اپنی اقتصادی صلاحیت تک محدود رہنے کے بجائے تعاون کو ٹھوس تجارت، سرمایہ کاری اور مالی اعانت کے نظام میں تبدیل کرنے کی ضرورت ہے ۔انہوں نے کہا کہ ”ہمارا ماننا ہے کہ برکس کی حقیقی طاقت صرف اس کے رکن ممالک کی معیشتوں کے حجم تک محدود نہیں ہے ، بلکہ یہ اس وقت زیادہ واضح ہوتی ہے جب ان صلاحیتوں کو تجارت، سرمایہ کاری اور مشترکہ مالی اعانت کے ایک نیٹ ورک میں تبدیل کیا جاتا ہے ۔” انہوں نے تجارتی شراکت داروں، مالی اعانت کے ذرائع اور ادائیگی کے ذرائع میں تنوع لانے کی اپیل کی۔ انہوں نے کہا کہ پابندیوں کے ساتھ ایران کے تجربے نے زیادہ اقتصادی استحکام کی ضرورت کو واضح کیا ہے ۔ایران کے صدر نے برکس ممالک کے درمیان ہونے والی تجارت میں قومی کرنسیوں کے زیادہ استعمال کی بھی حمایت کی اور کہا کہ برکس کے نیو ڈیولپمنٹ بینک (این ڈی بی) کو برکس ممالک میں بنیادی ڈھانچے اور توانائی کے منصوبوں کی مالی اعانت کا اہم ذریعہ بنایا جانا چاہیے ۔مسٹر پیزشکیان نے 10 ارب امریکی ڈالر کی ابتدائی سرمایہ کاری کے ساتھ برکس کی ایک مشترکہ ری بیمہ کمپنی قائم کرنے کی تجویز پیش کی۔ انہوں نے کہا کہ اپنی جغرافیائی حیثیت اور توانائی کے وسیع ذخائر کی وجہ سے ایران برکس کی توانائی، خوراک اور نقل و حمل کی سپلائی چینز میں ایک اہم شراکت دار بننے کے لیے تیار ہے ۔
مودی۔پیزشکیان کی مغربی ایشیا پر بات چیت، ہندوستان کا مذاکرات اور سفارت کاری کے ذریعے حل پر زور
نئی دہلی، 11 ستمبر (یو این آئی) مغربی ایشیا میں مسلسل بڑھتی کشیدگی کے درمیان وزیر اعظم نریندر مودی نے جمعہ کو یہاں ایران کے صدر ڈاکٹر مسعود پیزشکیان کے ساتھ دو طرفہ بات چیت کی۔برکس چوٹی کانفرنس سے الگ ہوئی بات چیت میں دونوں رہنماؤں نے دو طرفہ تعلقات کے مختلف پہلوؤں کے ساتھ مغربی ایشیا میں حالیہ پیش رفت پر بھی تبادلہ خیال کیا۔مسٹر مودی نے دہرایا کہ تمام مسائل کا حل مذاکرات اور سفارت کاری کے ذریعے ہونا چاہیے ۔ دونوں رہنماؤں کی دو ہفتے سے بھی کم عرصے میں یہ دوسری ملاقات ہے ۔ اس سے پہلے 31 اگست کو بشکیک میں بھی شنگھائی تعاون تنظیم کی چوٹی کانفرنس سے الگ دونوں کی ملاقات ہوئی تھی۔وزیر اعظم نے مشکل حالات کے باوجود برکس سے متعلق اجلاسوں میں ایران کی باقاعدہ اور اعلیٰ سطحی شرکت کی تعریف کی۔ انہوں نے کہا کہ عالمی جنوب کے ممالک کے درمیان استحکام، اختراع، تعاون اور استحکام کے جذبے کو مضبوط بنانے میں برکس اہل ہے ۔ وزیر اعظم نے بزنس فورم کے رہنماؤں کے اجلاس میں صدر پیزشکیان کی شرکت کے لیے بھی ان کا شکریہ ادا کیا۔
مغربی ایشیا میں حالیہ پیش رفت پر دونوں رہنماؤں نے اپنے خیالات کا تبادلہ کیا۔ وزیر اعظم نے خطے میں طویل مدتی امن اور استحکام کو یقینی بنانے کے لیے مسلسل کوششوں کی ضرورت پر زور دیا۔ انہوں نے جہاز رانی اور تجارت کی آزادی برقرار رکھنے کے ساتھ ملاحوں کی سلامتی یقینی بنانے کی ضرورت پر بھی زور دیا۔وزیر اعظم نے برکس سمیت کثیر فریقی تنظیموں میں مشترکہ مفادات کے امور پر ہندوستان اور ایران کے درمیان تعاون کی بھی تعریف کی۔