نئی دہلی۔31مارچ ۔(سیاست ڈاٹ کام) ہندوستان نے کورونا کی وبا سے نمٹنے کیلئے کفایتی دوا اور طبی آلات اور متعلقہ انسانی وسائل کی بلا رکاوٹ آمدو رفت پر زور دیا ہے۔ تجارت وصنعت کے مرکزی وزیر پیوش گوئل نے G-20 ملکوں کے سرمایہ کاری اور صنعت کے وزرا کی ایک میٹنگ سے خطاب کرتے ہوئے کہا کہ کورونا کی وبا سے نمٹنے کے لئے کفایتی دوائیں اور طبی آلات مہیا کرائے جانے چاہئے ۔ان چیزوں کا کاروبار سبھی ملکوں کے درمیان بلا رکاوٹ ہونا چاہئے ۔اس کے علاوہ ڈاکٹر ،نرس اور دیگر معاون ملازمین کی بلا رکاوٹ آمدورفت بھی ضروری ہے ۔تجارت وصنعت کی وزارت نے منگل کو یہاں بتایا کہ گوئل نے G-20 گروپ کے وزیر کی سطح کی میٹنگ میں ہندوستان کا موقف رکھتے ہوئے یہ تبصرہ کیا۔یہ میٹنگ ویڈیو کانفرنسنگ کے ذریعہ منعقد کی گئی۔ گوئل نے کہا کہ ہندوستان پر کفایتی دواؤں اور معیاری طبی آلات اور موثر انسانی وسائل کے لئے منحصر رہا جاسکتا ہے ۔انہوں نے کہا کہ G-20 ملکوں کو دوا،طبی آلات اور انسانی وسائل کی بلا رکاوٹ آمدورفت کو یقینی بنانا چاہئے ۔
