ریاض ۔سعودی عرب میں ٹریفک حادثات کی نگراں انشورنس کمپنی نجم کے ایگزیکٹیو چیئرمین محمد السلیمان نے کہا ہے کہ گزشتہ دنوں انشورنس کمپنیوں نے کورونا بحران کے زمانے میں ٹریفک حادثات کم ہونے کے باعث خوب منافع کمایا ہے۔ میڈیا کے مطابق السلیمان نے کہا ہے کہ سعودی عریبین مانیٹری اتھارٹی (ساما) اور محکمہ ٹریفک کی اسکیموں سے بھی انشورنس کمپنیوں کو کافی فائدہ ہوا ہے۔ السلیمان نے مزید کہا کہ کورونا وائرس کی وبا کے دوران کرفیو لگا ہوا تھا اس وجہ سے ٹریفک حادثات نہ ہونے کے برابر ہوئے۔ اس کا بڑا فائدہ انشورنس کمپنیوں کو پہنچا۔ حادثات نہ ہونے کی وجہ سے نقصانات کا مطالبہ کرنے والے کم تعداد میں تھے۔ انشورنس کمپنی کے ایگزیکٹیو چیئرمین نے کہا کہ ساما، محکمہ ٹریفک اور ٹریفک سلامتی کی وزارتی کمیٹی نے انشورنس کے دائرے کو وسعت دینے کے لیے متعدد اقدامات کیے ہیں۔ آئندہ ایام میں انشورنس کمپنیوں کو اس کا بھی فائدہ پہنچے گا۔
