ایک عمر کے بعد لوگ مرتے ہی ہیں،بی جے پی وزیر کامتنازعہ بیان
بھوپال:ہندوستان کی جن ریاستوں میں کورونا کی دوسری لہر نے قہر برپا کر رکھا ہے، ان میں مدھیہ پردیش بھی شامل ہے۔ چہارشنبہ کو مدھیہ پردیش میں ریکارڈ اموات درج کی گئی اور پہلی بار ایک دن میں 51 لوگوں کی موت ہوئی۔ علاوہ ازیں ریاست میں سرگرم مریضوں کی تعداد بھی 50 ہزار کے قریب پہنچ گئی ہے۔ ایسے ماحول میں مدھیہ پردیش کے وزیر پریم سنگھ پٹیل کا ایک عجیب و غریب بیان سامنے آیا ہے۔ انھوں نے کورونا پر قابو پانے کی کوشش سے پلہ جھاڑتے ہوئے کہا ہے کہ ان اموات کو کوئی نہیں روک سکتا۔شیوراج حکومت میں وزیر پریم سنگھ پٹیل نے اپنے متنازعہ بیان میں کہا ہے کہ ’’کورونا سے اموات لگاتار ہو رہی ہیں، جن کوکوئی نہیں روک سکتا ۔‘‘ حالانکہ ساتھ ہی انھوں نے یہ بھی کہا کہ ’’پورا ملک کہہ رہا ہے کہ کورونا سے بچنے کے لیے ہم سبھی لوگ تعاون کریں۔ ہم سبھی اسمبلی حلقوں میں جا کر لوگوں سے اپیل کر رہے ہیں کہ ماسک پہنیں اور کورونا سے بچیں۔ ساتھ ہی لوگ سوشیل ڈسٹنسنگ پر عمل کریں۔ اگر کسی کو کوئی شبہ ہو تو ڈاکٹروں سے رجوع ہوں۔ حکومت نے ہر جگہ پر ڈاکٹروں کا انتظام کیا ہے۔‘‘پریم سنگھ پٹیل صرف اتنے پر ہی خاموش نہیں ہوئے، بلکہ انھوں نے حیرت انگیز طور پر یہاں تک کہہ دیا کہ ’’ایک عمر کے بعد سبھی لوگوں کو مرنا ہی پڑتا۔‘‘ مدھیہ پردیش کے وزیر کا یہ بیان سوشیل میڈیا پر وائرل ہو گیا ہے اور لوگ انھیں تنقید کا نشانہ بنا رہے ہیں۔ کئی سوشیل میڈیا یوزر پریم سنگھ پٹیل کی ذہنیت پر بھی سوال اٹھا رہے ہیں۔