دبئی ۔ متحدہ عرب امارات کی ریاست راس الخیمہ کی پولیس نے کورونا وائرس سے بچاؤ کے لیے مقرر ضوابط کی پابندی نہ کرنے پر ایشیائی دولہے کو پبلک پراسیکیوشن کے حوالے کیا ہے ۔ دولہے نے راس الخیمہ کے شادی گھر میں تقریب منعقدکی تھی اور اس موقع پر مقررہ حفاظتی ضوابط کی پابندی نہیں کی گئی تھی۔تفصیلات کے مطابق پولیس نے دولہا کے خلاف کارروائی سوشل میڈیا پر شادی کی وڈیو وائرل کرنے کے بعد کی ہے۔ وڈیو میں صاف نظر آرہا تھاکہ مہمان کورونا وائرس سے بچاؤ کے لیے مقرر ضوابط کی پابندی نہیں کررہے ہیں۔ راس الخیمہ پولیس نے کہا کہ دولہا کو حراست میں لے کر قانونی کارروائی مکمل کرنے کے لیے ایمرجنسی پراسیکیوشن کی تحویل میں دے دیا گیا۔ راس الخیمہ محکمہ اقتصاد نے کہا ہے کہ اس نے متعلقہ شادی گھرکو مہر بندکردیا گیا ہے۔ بغیر اجازت شادی کی تقریب منعقد کرنے اور حفاظتی تدابیر پامال کرنے پر شادی گھر پر جرمانہ بھی کیا گیا۔ پولیس نے کہا ہے کہ کورونا وائرس کی وبا کو پھیلنے سے روکنے کے لیے مقرر اقدامات کے سلسلے میں پرعزم ہیں۔ کسی کو بھی وائرس سے بچاؤ کی تدابیر کی پابندی نہ کرنے پر مقررہ سزاؤں کا سامنا کرنا پڑے گا۔
