ملٹری ہاسپٹل سے ہی صدارتی امور انجام دیں گے ،انتخابی مہم کے تمام پروگرام عارضی طورپر ملتوی
واشنگٹن: کورونا وائرس میں مبتلا امریکی صدر ڈونالڈ ٹرمپ کوسانس لینے میں دشواری کے بعد ہاسپٹل منتقل کردیا گیا اور ہاسپٹل منتقلی کے وقت وہ چہرے پر بڑا سا کالاماسک لگا کر خود چلتے ہوئے ہیلی کاپٹر میں سوار ہوئے۔وائٹ ہاوس کے مطابق صدر میں کورونا کی درمیانی درجے کی علامات ظاہر ہوئی ہیں، انہیں بخار ہے اور سینے میں درد اور کھانسی ہے۔وائٹ ہاؤس کا کہنا ہیکہ صدر ٹرمپ کی انتخابی مہم کے تمام ایونٹ عارضی طورپر ملتوی یا ورچوئل کردیے گئے ہیں جب کہ خاتون اول کے ایونٹس بھی ملتوی کردیے گئے ہیں، صدر کو آئندہ چند روز ملٹری ہاسپٹل میں ہی رہنا پڑے گا جہاں سے وہ صدارتی امور بھی انجام دیتے رہیں گے۔امریکی صدر اور ان کی اہلیہ کورونا وائرس میں مبتلا ہوگئے۔امریکی صدر کے معالج کا کہنا ہے کہ ڈونالڈ ٹرمپ کو سینتھیٹک اینٹی باڈیز دی گئی ہیں، پولی کلونل اینٹی باڈی کاکٹیل کی 8 گرام ڈوز دی گئی ہے، صدر ٹرمپ تھکاوٹ کا شکار ہیں تاہم اینٹی باڈیز دیے جانے کے موقع پر انہوں نے تامل نہیں کیا، انہیں وٹامن ڈی، ایسپرین، فیموٹائی ڈین اور میلاٹونین بھی دی جارہی ہیں۔وائٹ ہاؤس کے ڈاکٹر کا کہنا ہیکہ صدر ٹرمپ کو آکسیجن کی ضرورت نہیں ہے جب کہ چیف آف اسٹاف مارک میڈوز نے توقع ظاہر کی کہ صدر ٹرمپ جلد مکمل صحت یاب ہوجائیں گے۔ ہاسپٹل منتقلی سے قبل امریکی صدر نے ٹوئٹر کے ذریعے ویڈیو بیان جاری کیا جس میں انہوں نے اپنے اور خاتون اول کے لیے نیک تمناؤں کا اظہار کرنے والوں کا شکریہ ادا کیا۔صدر ٹرمپ کا کہنا تھا کہ وہ اور ان کی اہلیہ بہتر محسوس کررہے ہیں تاہم مزید بہتری کے لیے وہ ہاسپٹل منتقل ہورہے ہیں۔امریکی صدر کا پی سی آرٹیسٹ جمعہ کو مثبت آیا تھا، ٹرمپ کی عمر 74 برس ہے۔ امریکہ کے بعض اعلیٰ ڈاکٹروں کا خیال ہے کہ عمر اور وزن زیادہ ہونے کی وجہ سے ڈونالڈ ٹرمپ زیادہ سنگین نوعیت کی کووڈ 19 بیماری کا شکار ہوسکتے ہیں۔دوسری جانب امریکی سینیٹر مائیک لی بھی کورونا میں مبتلا ہوگئے ہیں۔