جنیوا،18مارچ(سیاست ڈاٹ کام) جان لیوا کورونا وائرس سے چین میں 11 نئی اموات سامنے آئی ہیں، جس کے بعد یہاں اس موذی وباء سے ہلاکتیں3237 جبکہ دنیا بھر میں 7988 ہو گئیں۔چین کے نیشنل ہیلتھ کمیشن کے مطابق چین میں کورونا کے 13 نئے کیسز سامنے آئے ہیں جس کے بعد چین میں کورونا وائرس کے مریضوں کی کل تعداد 80 ہزار 894 ہو چکی ہے ۔نیشنل ہیلتھ کمیشن کا یہ بھی کہنا ہے کہ چین میں کورونا وائرس کے شکار ہو کر صحت یاب ہونے والے 69 ہزار 6 سو مریض ڈسچارج ہو چکے ہیں، جبکہ 8 ہزار اب بھی زیرعلاج ہیں۔ادھر دنیا بھر میں کورونا وائرس سے ہونے والی اموات کی تعداد 7 ہزار 988 ہو گئی، جبکہ اس وائرس کے مریضوں کی تعداد دو لاکھ سے متجاوز کر گئی ہے ۔چین کے بعد اٹلی میں کورونا وائرس کے مریضوں کی تعداد سب سے زیادہ ہے جہاں ساڑھے 31 ہزار مریض اور اموات کی تعداد ڈھائی ہزار ہو گئی ہے ۔ایران میں کورونا وائرس کے 16 ہزار مریض ہیں، جبکہ وہاں اس سے ہلاکتیں 988 ہوگئی ہیں۔کورونا وائرس سے اسپین میں اب تک کل اموات 988، جرمنی میں 26، جنوبی کوریا میں 84، فرانس میں 175، امریکہ میں 115، برطانیہ میں 71، سوئٹزر لینڈ میں 27، نیدر لینڈز میں 43، بیلجیئم میں10، جاپان میں 29 اور فلپائن میں 14 ہو چکی ہیں۔
