چنڈی گڑھ،19مارچ (سیاست ڈاٹ کام)چنڈی گڑھ کے سماجی کارکن اور وکیل اجے جگا نے آج مطالبہ کیا کہ کورونا وائرس کے قہر کو روکنے کے لئے بیرون ممالک سے آنے والے جن افرادکو گھروں میں الگ تھلگ رہنے کی ہدایت دی جا رہی ہے اور جو متاثر ہیں،ان کی معلومات جاری کی جائے تاکہ پڑوسی اور دیگر لوگ احتیاط برت سکیں ۔اور مشتبہ مریضوں سے دور رہ کر اپنی حفاظت کر سکیں۔‘روگی کلیان سمیتی’کے ممبراجے جگا نے مرکزی وزیربرائے صحت ہرش وردھن کو خط لکھ کر کہا ہے کہ موہالی ہوائی اڈہ پر بیرون ممالک سے واپس آنے والے 314 افراد کو جنہیں جانچ کے بعد گھروں میں الگ تھلگ رہنے کی ہدایت دی گئی ہے لیکن ان پر نگرانی نہیں رکھی جا رہی ہے اس لئے ان کے پڑوسی بھی ان سے بے خبر ہیں ۔اس کے علاوہ جو متاثر پائے گئے ہیں اور گھروں میں الگ رکھے گئے ہیں ان کی معلومات وسیع تر عوامی مفاد میں عام کی جانی چاہئے تاکہ ان سے معاشرتی فاصلہ بنائے رکھنے میں مدد مل سکے ۔انھوں نے اپیل کی ہے کہ وسیع تر عوامی مفاد میں متاثرہ اور گھروں میں تنہا رہنے والے افراد کی معلومات عام کی جائے تاکہ دوسرے احتیاط برت سکیں۔مسٹر جگا کے مطابق اس سے حکومت کو بھی وائرس پر قابو پانے اور پھیلاؤ پر روک لگانے میں مدد ملے گی۔انہوں نے کہا کہ اس سے جو لوگ گھروں میں تنہا رہنے کی ہدایات کی خلاف ورزی کریں گے اس کا پتہ چل سکے گا اور احتیاطی تدابیر اختیار کی جا سکے گی ۔
