اسلام آباد : وفاقی وزیر منصوبہ بندی اسد عمر کا کہنا ہے کہ کورونا وائرس کی چوتھی لہر منظر عام پر آنا شروع ہوگئی ہے جس کے سبب ملک بھر میں کورونا لاک ڈائون دوبارہ شروع کیا جاسکتا ہے۔وفاقی وزیر نے سماجی رابطے کی ویب سائٹ پر جاری ایک ٹویٹ میں بتایا کہ دو ہفتے قبل A.I کمپیوٹر ماڈلز نے کورونا کی چوتھی لہر سے خبردار کیا تھا اور اب اس لہر کے اثرات منظر عام پر آنا شروع ہوگئے ہیں۔اسد عمر کا کہنا تھا کہ کورونا وائرس کی اس نئی لہر کا سبب کورونا ایس او پیز کی پابندی میں ناکامی ہے جس کے سبب بھارتی تغیر کا حامل وائرس تیزی سے پھیل رہا ہے۔اسد عمرنے کہا کہ رپورٹس کے مطابق عوام ان ڈورشادیوں، ریسٹورنٹ اور جم میں شرکت کے لیے ویکسینیشن کی شرط کو نظر انداز کر رہے ہیں، اگر مالکان ذمہ داری کا مظاہرہ کرتے ہوئے ایس اوپیز پر عملدر آمد نہیں کریں گے تو یہ سہولیات بند کرنا پڑیں گی۔
