نئی دہلی : کووڈ۔ 19 وبا کے دوران ملک میں پٹرول اور ڈیزل کی کھپت میں کمی آئی ہے جبکہ ایل پی جی کی کھپت میں اضافہ ہوا ہے ۔مالی سال 2020-21 میں ملک میں پٹرول کی کھپت 280 لاکھ ٹن رہی۔ اس سے قبل مالی سال 2019-20 ء میں 300 لاکھ ٹن پٹرول فروخت ہوا تھا۔ اس طرح اس کی فروخت میں 6.67 فیصد کمی واقع ہوئی ہے ۔ اس عرصے کے دوران ، پیداوار 386 لاکھ ٹن سے کم ہوکر 358 لاکھ ٹن ہوگئی۔اسی طرح ڈیزل کی کھپت میں بھی 2019-20 ء کے 8.26 کروڑ ٹن سے 10.99 فیصد کم ہوکر 7.27 کروڑ ٹن رہ گئی تھی۔ ایک سال قبل 11.11 کروڑ ٹن کے مقابلے میں ڈیزل کی پیداوار بھی 10.04 ملین ٹن رہی۔ملک کی سب سے بڑی آئل مارکیٹنگ کمپنی انڈین آئل کارپوریشن کے چیئرمین ایم ایم ویدیہ نے کمپنی کے سہ ماہی نتائج کے اعلان کے دوران ،کہا کہ پٹرول اور ڈیزل کی طلب فی الحال عام دنوں کے مقابلے میں 15 سے 20 فیصد کم ہے ۔ تاہم ، ایل پی جی کی طلب میں تقریبا پانچ فیصد اضافہ ہوا ہے ۔سرکاری اعداد و شمار کے مطابق ، گذشتہ مالی سال میں ایل پی جی کی کھپت 276 لاکھ ٹن تھی۔ یہ مالی سال 2019-20 ء کے 263 لاکھ ٹن سے 4.94فیصد زیادہ ہے ۔
