حیدرآباد۔ 5 ؍ اپریل ( سیاست ڈاٹ کام) خوفناک وباء کوویڈ۔19 کے انسداد کے لئے ٹیکہ کی تیاری کے ضمن میں حیدرآباد کے ویکسن بنانے والے داراہ بھارت بائیوٹیک نے امریکہ کی وسکانسن میڈیسن یونیورسٹی اور ایک ویکسن بنانے والی کمپنی فلوجن کے ساتھ ٹیکہ بنانے کا عمل شروع کر دیا ہے ۔ کورو فلو سے موسوم ویکسن توقع ہے کہ رواں سال کے اختتام سے انسان پر تجربوں کا آغاز کرے گی ۔ بھارت بائیوٹیک اعلامیہ کے مطابق کورو فلو ٹیکہ کورونا وائرس اور مماثل انفلوئیزا کے قدرتی طور پر پھیلنے کو روکنے میں معاون ثابت ہوگا ۔ مانع وبا کے طور پر کام کرنے والا یہ ٹیکہ خطرہ لاحق ہونے کے ساتھ ہمہ اقسام کے مدافعتی نظام کو سرگرم و متحرک کر دیگا ۔ بھارت بائیوٹیک میں بزنس ڈیولپمنٹ سربراہ ڈاکٹر راچس ایلا نے کہا کہ بائیوٹیک یہ ٹیکہ تیار کرے گی جس کے کلنیکل تجربے جاری ہیں ۔ دنیا بھر میں تقسیم کے لئے کم سے کم 300 ملین خوراک تیار کئے جائیں گے ۔