کویت سٹی۔8 جون (سیاست ڈاٹ کام)کویت میں چہارشنبہ سے تین ماہ کی پابندی کے بعد مساجد کھولنے اور تجارتی پروازیں بتدریج بحال کرنے کا اعلان کیا ہے۔کویتی خبررساں ادارے کونا کے مطابق وزیر انصاف و اوقاف و اسلامی امور ڈاکٹر فہد العفاسی نے کہا کہ چہارشبنہ کو مساجد میں نمازیں جماعت سے ادا کی جائیں گی۔ ظہر کی نماز کویت کے اہم علاقوں میں مساجد میں جماعت سے پڑھی جائے گی تاہم جمعہ کی نماز صرف بڑی جامع مساجد میں ہوگی اور کویت کے سرکاری ٹی وی سے براہ راست نشر کی جائے گی۔ڈاکٹر فہد العفاسی نے یہ اعلان کو سیکریٹری اوقاف و اسلامی امور فرید عمادی سمیت وزارت کے کئی اعلی عہدیداروں کی موجودگی میں ملک کے چھ صوبوں کی مساجد کے عہدیدااروں سے ملاقات کے دوران کیا ہے۔اس موقع پھر ملک کی تمام مساجد جماعت سے نماز کے لیے بحال کرنے کا طریقہ کار بھی زیر بحث آیا اور اس حوالے سے انتظامات پر بھی غوروخوض کیا گیا۔کویتی وزیر نے مزید کہا کہ مساجد کھولنے کا فیصلہ تین ماہ کی پابندی کے بعدکیاگیاہے۔ وزارت نے منتخب مقامات پر مساجد کی سینیٹائزنگ اور مساجد کھولنے کے تمام انتظامات مکمل کرلئے ہیں۔ انہوں نے تمام نمازیوںکو تاکید کی کہ وہ اپنی صحت و سلامتی کی خاطر صحت اداروں کی ہدایات کی پابندی کریں۔ ویب سائٹ کے مطابق وزیر مملکت برائے امور خدمات مبارک الحریص نے کہا کہ محکمہ شہری ہوابازی نے کمرشل پروازوں کے لئے کویت انٹرنیشنل ایرپورٹ کھولنے کا پروگرام تیارکرلیا۔انہوں نے کہا کہ ایرپورٹ تین مراحل میں کھولا جائے گا جہاں سے تجارتی پروازیں بیرون کویت جائیں گی اورمختلف ممالک سے کویت بھی آئیں گی۔ پہلے مرحلے میں 30 فیصد، دوسرے مرحلے میں 60 فیصد اور تیسرے مرحلے میں تمام کمرشل پروازیں بحال کردی جائیں گی۔
