سنگاریڈی میں ایچ پی وی ویکسین کی تقسیم، پروگرام کو کامیاب بنانے عوام سے کلکٹر کی اپیل
سنگاریڈی۔ 8؍مارچ (سیاست ڈسٹرکٹ نیوز)۔ سنگا ریڈی ضلع کلکٹر پی۔ پراوینیا نے کہا ہے کہ دنیا بھر میں خواتین میں ایک بڑی صحت کی پریشانی بننے والے سروائیکل کینسر کی روک تھام کے لیے ایچ پی وی (HPV) ویکسین بہت مؤثر ثابت ہو رہی ہے۔ اتوار کے روز سنگاریڈی جنرل اسپتال میں ایچ پی وی ویکسینیشن پروگرام کا افتتاح کیا گیا اس موقع پر کلکٹر نے بتایا کہ ضلع میں 15 سال سے کم عمر کی لڑکیوں کو جنرل اسپتال اور ایریا اسپتالوں میں ایچ پی وی ویکسین مفت فراہم کی جائے گی۔ انہوں نے کہا کہ ضلع میں 14 سے 15 سال کی عمر کے درمیان تقریباً 12,500 لڑکیوں کی نشاندہی محکمہ صحت کے حکام نے کی ہے۔ ان تمام لڑکیوں کو پرجا پالنا – پرگتی منصوبہ کے 99 روزہ پروگرام کے دوران مفت ویکسین دی جائے گی۔کلکٹر نے مزید کہا کہ لڑکیوں کی صحت کو مدنظر رکھتے ہوئے یہ ویکسین والدین کی موجودگی میں ہی دی جائے گی۔ انہوں نے عوام سے اپیل کی کہ کینسر سے پاک معاشرہ بنانے کے لیے اس پروگرام کو کامیاب بنانے میں تعاون کریں۔ انہوں نے عوام سے درخواست کی کہ حکومت کی جانب سے شروع کیے گئے اس ویکسینیشن پروگرام سے بھرپور فائدہ اٹھائیں۔ اس پروگرام میں ضلع میڈیکل اینڈ ہیلتھ آفیسر ڈاکٹر وسنت راؤ، محکمہ صحت کے افسران اور دیگر عملہ موجود تھے۔
