اوٹاوا : کینیڈا کے نو منتخب وزیر اعظم مارک کارنی نے حلف اٹھاتے ہی کینیڈا کے امریکہ میں ضم ہونے سے متعلق اہم اعلان کر دیا۔ کینیڈا کی لبرل پارٹی کے رہنما مارک کارنی نے ملک کے 24ویں وزیراعظم کے عہدے کا حلف اٹھایا۔ حلف برداری کی تقریب اوٹاوا میں ہوئی۔ گورنر جنرل میری سیمون نے مارک کارنی سے حلف لیا۔ حلف کے بعد پہلی تقریر میں مارک کارنی نے اعلان کیا کہ کینیڈا کبھی امریکہ میں ضم نہیں ہوگا۔ کینیڈین وزیراعظم نے کہا کہ کینیڈا کبھی کسی صورت میں، کسی بھی شکل میں امریکہ کا حصہ نہیں بنے گا۔ نو منتخب وزیراعظم مارک کارنی جو بڑھتی تجارتی جنگ پر امریکی صدر ڈونالڈ ٹرمپ کے ساتھ تنازعہ کا سامنا کر رہے ہیں، نے کہا کہ وہ امریکہ سے عزت و احترام کی توقع رکھتے ہیں۔ انہوں نے امریکی وزیر خارجہ مارکو روبیو کے کینیڈا کو 51ویں ریاست بنانے سے متعلق حالیہ بیان کو پاگل پن قرار دیا ۔ کینیڈین وزیر اعظم کارنی نے بتایا کہ وہ بطور وزیرِاعظم پہلے غیر ملکی دورہ پر فرانس اور برطانیہ جائیں گے ، جبکہ انہوں نے یہ بھی واضح کیا کہ ان کا فی الحال ٹرمپ سے ملاقات کا کوئی ارادہ نہیں، لیکن وہ ان سے بات کرنے کے خواہاں ہیں۔ جب ان سے پوچھا گیا کہ کینیڈا میں عام انتخابات کب متوقع ہیں، تو انہوں نے کوئی واضح تاریخ دینے سے گریز کیا اور مذاقاً کہا کہ کینیڈین عوام کو نومبر سے پہلے ووٹ ڈالنے کا موقع ملے گا۔
