نئی دہلی۔ ہندوستانی سابق آف اسپنر ہربھجن سنگھ نے بیٹنگ میں جدوجہد پر ہنگامہ آرائی کے درمیان کے ایل راہول کی حمایت کرتے ہوئے سب سے درخواست کی ہے کہ وہ 30 سالہ بیٹرکو تنہا چھوڑ دیں اور ایک مضبوط واپسی کیلئے ان کی حمایت کریں۔ راہول حال ہی میں ٹسٹ کرکٹ میں مشکل وقت سے گزر رہے ہیں۔ دائیں ہاتھ کے بیٹر نے ہندوستان کے لیے کھیلے گئے آخری چھ ٹسٹ میچوں میں صرف ایک نصف سنچری اسکور کی ہے۔ جاری بارڈرگواسکر ٹرافی میں انہوں نے پہلے دو ٹسٹ میں 20، 17 اور 1کے اسکور بنائے ہیں۔ حالیہ میچوں میں ان کی ناقص کارکردگی کے باوجود، راہول کو اب بھی ٹیم انتظامیہ کی حمایت حاصل ہے یہاں تک کہ اگر ایک ان فام کھلاڑی شبھمن گل باہر بیٹھا ہے، جس پر سابق ہندوستانی فاسٹ بولر وینکٹیش پرساد اور مداحوں کی طرف سے بھی شدید تنقید ہوئی ہے۔ اس معاملے پر تبصرہ کرتے ہوئے، ہربھجن نے ٹویٹ کیا اور مداحوں سے کہا کہ وہ اسٹار اوپنر پر بھروسہ رکھیں۔ کیا ہم راہول کو اکیلا چھوڑ سکتے ہیں لوگو؟ اس نے کوئی جرم نہیں کیا ہے۔ وہ اب بھی ایک ٹاپ کھلاڑی ہے۔ وہ مضبوط واپس آئے گا۔ ہم سب بین الاقوامی کرکٹ میں اس طرح کے دور سے گزرتے ہیں۔ وہ پہلا اورآخری کھلاڑی نہیں ہے۔ لہذا براہ کرم اس حقیقت کا احترام کریں کہ وہ ہمارے اپنے کھلاڑی ہیں ۔
