بریلی (اترپردیش ): گائے کا پیشاب جسے کئی دہوں سے کرشماتی دوا کہا جاتا رہا ہے، اب براہ راست انسانی استعمال کے لیے غیر موزوں پایا گیا ہے کیونکہ اس میں ممکنہ طور پر نقصان دہ بیکٹیریا موجود ہیں۔ بریلی میں واقع آئی سی اے آر ۔ انڈین ویٹرنری ریسرچ انسٹی ٹیوٹ (آئی وی آر آئی) کی طرف سے کی گئی تحقیق، جو ملک کی سب سے بڑی جانوروں پر تحقیق کرتی ہے، اس نے پایا ہے کہ گائے کا پیشاب بعض بیکٹیریا پر زیادہ موثر تھا۔ انسٹی ٹیوٹ کے بھوج راج سنگھ کی سربراہی میں پی ایچ ڈی کے تین طالب علموں کے ساتھ کی گئی تحقیق میں پتا چلا کہ صحت مندگایوں اور بیلوں کے پیشاب کے نمونوں میں کم ازکم 14 قسم کے نقصان دہ بیکٹیریا موجود ہیں جن میںاسکوریچیا کولی موجود ہے جو کہ عام طور پر پیٹ میں انفیکشن کا سبب بن سکتا ہے ۔ ہم مرتبہ نظرثانی شدہ تحقیق کے نتائج آن لائن ریسرچ ویب سائٹ ریسرچ گیٹ میں شائع کیے گئے ہیں۔ سنگھ، جو انسٹی ٹیوٹ میں ایپیڈیمولوجی کے شعبے کے سربراہ ہیں، نے کہاگائے، بھینس اور انسانوں کے پیشاب کے73 نمونوں کے شماریاتی تجزیے سے پتہ چلتا ہے کہ بھینس کے پیشاب میں اینٹی بیکٹیریل سرگرمی گائے سے کہیں زیادہ بہتر تھی۔ بھینس کا پیشاب بیکٹیریا پر نمایاں طور پر زیادہ موثر تھا۔ انہوں نے وضاحت کی ہم نے تین قسم کی گایوں کے پیشاب کے نمونے ساہیوال، تھرپارکر اور ونداوانی (کراس نسل) کے مقامی ڈیری فارموں سے اکٹھے کئے ، ساتھ ہی بھینسوں اور انسانوں کے نمونوں کے ساتھ۔ ہمارا مطالعہ، جون اور نومبر 2022 کے درمیان کیا گیا۔ مطالعہ سے نتیجہ اخذ کیا گیا کہ بظاہر صحت مند افراد کے پیشاب کے نمونوں کا ایک بڑا حصہ ممکنہ طور پر روگجنک بیکٹیریا لے کر جاتا ہے۔ کچھ افراد کا پیشاب، قطع نظر جنس اور نسل کے، بیکٹیریا کے منتخب گروپ کے لیے روکاوٹ کا باعث ہو سکتا ہے لیکن عام خیال کہ گائے کا پیشاب اینٹی بیکٹیریل ہے، کو عام نہیں کیا جا سکتا۔ انہوں نے مزید کہا کہ کسی بھی صورت میں انسانی استعمال کے لیے پیشاب کی سفارش نہیں کی جا سکتی۔ کچھ لوگ یہ دعویٰ پیش کرتے ہیں کہ کشید شدہ پیشاب میں متعدی بیکٹیریا نہیں ہوتے۔ ہم اس پر مزید تحقیق کر رہے ہیں۔ قابل ذکر بات یہ ہے کہ کئی سپلائرزکے ذریعہ ہندوستانی مارکیٹ میں فوڈ سیفٹی اینڈ اسٹینڈرڈز اتھارٹی آف انڈیا ( ایف ایس ایس اے آئی) کے ٹریڈ مارک کے بغیرگائے کا پیشاب بڑے پیمانے پر فروخت کیا جاتا ہے۔
