نئی دہلی۔ 4 فبروری ۔(سیاست ڈاٹ کام) بھارتیہ جنتا پارٹی کے ایک ممبر پارلیمنٹ کی طرف سے مہاتما گاندھی پر دیئے گئے متنازعہ بیان پر لوک سبھا میں منگل کو حکومت اور اپوزیشن کے درمیان تیکھی نوک جھونک ہوئی اور اس کے بعد کانگریس اور دیگر اپوزیشن پارٹیوں نے ایوان سے واک آؤٹ کیا۔اسی معاملہ پر صبح سوال کے دوران ایوان کی کارروائی ملتوی ہونے کے بعد دوپہر 12 بجے جب کارروائی دوبارہ شروع ہوئی تو کانگریس کے لیڈر ادھیر رنجن چودھری نے وقفہ صفر میں یہ مسئلہ اٹھاتے ہوئے کہا کہ حکمران بی جے پی کے لیڈروں کی طرف سے بابائے قوم مہاتما گاندھی کو گالی دی جا رہی ہے ، ان کے ستیہ گرہ کو ’ ڈرامہ ‘بتایا جا رہا ہے ۔ انہوں نے راون سے جوڑتے ہوئے بی جے پی کے ارکان کیلئے کچھ قابل اعتراض تبصرہ کیا۔ ان کے اتنا کہتے ہی برسراقتدار پارٹی کے ممبران بھی کھڑے ہو گئے اور اعتراض کرنے لگے ۔اسی درمیان کانگریس کے ممبران ہاتھوں میں تختیاں لئے ایوان کے وسط میں آ گئے اور ’’مہاتما گاندھی امر رہے‘‘ کے نعرے لگانے لگے ۔
