گجویل۔ گجویل پرگنا پور میونسپل برائے 2021-22 کے بجٹ کا اجلاس آج گجویل میونسپل دفتر میں گجویل میونسپل چیرمین راج مولی کی صدارت میں منعقد ہوا جس میں مہمان خصوصی کی حیثیت سے ضلع سدی پیٹ ایڈیشنل کلکٹر جناب مزمل خان نے شرکت کی۔ اس اجلاس میں گجویل میونسپل کمشنر وینکٹ گوپال نے امسال کا بجٹ پیش کیا جس میں جاریہ سال گجویل پرگنا پور میونسپل کے تحت 53 لاکھ 30 ہزار 664 روپئے آمدنی ہونے کا اندازہ لگایا گیا۔ میونسپل کمشنر وینکٹ گوپال نے مجلس بلدیہ کے عاملہ کو اس کی تفصیلات سے واقف کرواتے ہوئے بتایا کہ جاریہ سال انکم ٹیکس کے ذریعہ 6 کروڑ 73 لاکھ 32 ہزار روپئے کی آمدنی ہونے کے علاوہ فی الحال میونسپل خزانہ میں جمع شدہ رقم 3 کروڑ 55 لاکھ 58 ہزار 664 روپئے موجود رہنے کے علاوہ جاریہ سال نان پلان گرانٹ کے تحت 5 کروڑ 21 لاکھ 52 ہزار روپیوں کی آمدنی ہونے کے علاوہ پلان گرانٹ کے تحت 2 کروڑ آمدنی بلدیہ کو ہونے کا اندازہ لگایا گیا اور دیگر گرانٹس کے تحت ایک کروڑ 53 لاکھ روپیوں کی آمدنی ہونے کے امکانات ہیں۔ اس طرح 31 مارچ 2022 تک گجویل پرگنا پور میونسپل کے تحت موجود جملہ 20 وارڈز میں ہونے والی اس آمدنی کے تحت بلدی حدود کے عوام کو بنیادی سہولتیں فراہم کرنے کے علاوہ دیگر ترقیاتی کام انجام دیئے جائیں گے۔ کمشنر وینکٹ گوپال نے گجویل پرگنا پور کے جملہ 20 وارڈوں کے کونسلروں سے گذارش کی کہ وہ اپنے اپنے وارڈوں میں ترقیاتی کاموں کیلئے قراردادیں پیش کریں۔ بجٹ اجلاس میں وائس چیرمین بابا زکی الدین، میونسپل کونسلرس چندو، بالا منی ، ورا لکشمی ، عبدالرحیم، راجنا، شیاملا، رجیتا، سرینواس، چندنا، شہناز بیگم، سریشا گوپال ریڈی کے علاوہ میونسپل عہدیدار موجود تھے۔
