اسلام آباد: وزیراعظم پاکستان شہباز شریف نے بی جے پی رہنما کی جانب سے رسول اللہ صلی اللہ علیہ وآلہ وسلم کی شانِ اقدس میں بدترین گستاخی کی شدید مذمت کرتے ہوئے کہا کہ مودی کے دورحکومت میں ہندوستان میں مذہبی آزادی پامال ہورہی ہے جس پر دنیا کو فوری ایکشن لینا چاہیے۔ وزیراعظم شہباز شریف نے بی جے پی کی مرکزی ترجمان نوپور شرما کی جانب سے حضورؐکی شان میں گستاخی پر شدید غم وغصے کا اظہار کیا اور کہا کہ ہمارے پیارے نبیؐ کی ذات پاک کے بارے میں بی جے پی رہنما کے بیان کی شدید مذمت کرتا ہوں جس سے ہم سب مسلمانوں کے مذہبی جذبات کو ٹھیس پہنچی ہے۔ وزیراعظم شہباز شریف نے واضح کیا کہ ہمارے پیارے نبی ؐکیلئے ہماری محبت ہر چیز پر مقدم ہے اور آقا کریم صلی اللہ علیہ وآلہ وسلم کی محبت اور ان کی ناموس کیلئے ہر مسلمان اپنی جان قربان کرنے کو تیار ہے۔اپنے ٹوئٹ میں وزیر اعظم شہباز شریف نے کہا کہ بارہا کہہ چکا ہوں کی مودی کے اقتدار میں مذہبی آزادیوں کو کچلا اور مسلمانوں کو انتقام کا نشانہ بنایا جا رہا ہے، دنیا نوٹس لیتے ہوئے ان اقدامات پر ہندوستان کی سرزنش کرے۔
