عدالتی تحقیقات کا حکم، غیر قانونی تعمیرات کی شکایت کے بعد بھی کلب کیسے چل رہا تھا؟
پاناجی۔7؍ڈسمبر ( ایجنسیز )گوا کے ارپورہ میںواقع ایک نائٹ کلب میں آتشزدگی کی المناک واردات میں مرنے والوں کی تعداد بڑھ کر25 ہوگئی ہے جبکہ 6 دیگر زخمی ہیں۔ ان کا علاج چل رہا ہے اور ان کی حالت مستحکم بتائی جارہی ہے۔نائٹ کلب واردات میں 25 افراد کی موت کے بعد اب اس حادثہ کی وجوہات کی تحقیقات شروع کر دی گئی ہیں۔ چیف منسٹرگوا پرمود ساونت نے قصورواروں کے خلاف سخت کارروائی کرنے کا انتباہ دیا ہے۔ ابتدائی تحقیقات میں نائٹ کلب میں متعدد کوتاہیوں کا انکشاف ہوا ہے جن میں کہا جارہا ہے نائٹ کلب میں آگ سے بچاؤ کے ضوابط کی خلاف ورزی کی گئی اور لوگوں کی حفاظت سے کھلواڑ کیا گیا۔ اس کے ساتھ ہی یہ بھی دعویٰ کیا جا رہا ہے کہ نائٹ کلب میں غیر قانونی تعمیرات کی شکایت درج کرائی گئی تھی۔ اس صورت میں سوال پیدا ہوتا ہے کہ شکایت کے باوجود نائٹ کلب کیسے چلایا جارہا تھا؟بتایا جارہا ہے کہ نائٹ کلب کے داخلی اور خارجی دروازے انتہائی تنگ تھے جس سے لوگ بھاگ نہیں سکے اور بھیڑ میں پھنس کر حادثہ کا شکار ہوگئے۔ نائٹ کلب پانی کے اندر واقع تھا اور ایک تنگ راستے سے زمین سے جڑا ہوا تھا جس کی وجہ سے آگ پر قابو پانے میں مشکل ہوئی اور کافی جانی و مالی نقصان ہوا۔وہیں گوا کے پولیس چیف آلوک کمار نے بتایا کہ سلنڈر میں دھماکے کی وجہ سے آگ لگی لیکن کئی عینی شاہدین کا کہنا ہے کہ آگ نائٹ کلب کی پہلی منزل پر لگی جہاں بڑی تعداد میں سیاح رقص کر رہے تھے۔ اس دوران ایک خاتون سیاح نے بتایا کہ آگ اچانک بھڑک اٹھی جب تک ہم لوگ باہر نکلے تب تک نائٹ کلب آگ کی لپیٹ میں آچکا تھا۔واقعہ کے بعد وزیر اعلیٰ پرمود ساونت نے کہا کہ تمام زخمیوں کی حالت مستحکم ہے اور انہیں بہترین علاج فراہم کیا جا رہا ہے۔ اس واقعے کی وجوہات اور ذمہ داروں کی شناخت کے لیے مجسٹریٹی انکوائری کا حکم دیا گیا ہے۔ وزیراعلیٰ نے کہا کہ ریاستی حکومت متاثرین کے اہل خانہ کے ساتھ کھڑی ہے اور قصورواروں کے خلاف سخت قانونی کارروائی کی جائے گی۔وہیں گوا کانگریس کے انچارج مانیک راؤ ٹھاکرے نے اس واقعہ کو انتہائی افسوسناک قراردیا۔ انہوں نے ’ایکس‘ پر لکھا کہ ہمیں ارپورہ کے برچ بائی رومیو لین نائٹ کلب میں لگنے والی آگ سے بہت دکھ ہوا ہے۔ اس واقعہ میں بہت سے معصوم لوگوں نے اپنی جانیں گنوائی ہیں۔ جن خاندانوں اپنے پیاروں کو کھویا ہے ان کے تئیں ہماری گہری ہمدردی ہے۔ انہوں نے مزید کہا کہ کانگریس اس سانحہ سے متاثرہ تمام لوگوں کے ساتھ کھڑی ہے۔ چیف منسٹر گوا نے جائے حادثہ کا معائنہ کیا۔ صدرجمہوریہ دروپدی مرمو، وزیراعظم نریندر مودی، صدر کانگریس ملکارجن کھرگے، قائد اپوزیشن راہول گاندھی اور دیگر قائدین نے اس حادثہ پر گہرے دکھ کا اظہار کیا ہے۔