لارڈز ۔13 جولائی (سیاست ڈاٹ کام) نیوزی لینڈ کے بیٹسمین مارٹن گپٹل نے اولڈ ٹریفورڈ کے سیمی فائنل میں ہندوستان کے سابق کپتان اور وکٹ کیپر بیٹسمین مہندر سنگھ دھونی کو ایسے وقت پر براہ راست تھرو سے رن آوٹ کیا جب وہ ہندوستان کو جیت کی طرف لے جارہے تھے۔ مارٹن گپٹل نے کہا کہ ورلڈ کپ میں مجھے اپنی بیٹنگ کارکردگی کی وجہ سے مایوسی ہوئی ہے لیکن خوشی ہے کہ مہندر سنگھ دھونی کو رن آوٹ کرکے مجھے شہرت ملی ہے۔ انہوں نے اعتراف کیا کہ شائقین مجھ سے میری کارکردگی کی وجہ سے مایوس ہیں، لیکن مجھ سے زیادہ مایوس کوئی اور نہیں ہے۔ مجھے امید ہے کہ فائنل میں ناکامیوں کا ازالہ کروں گا، ایسی کارکردگی دکھاوں گا جس کی مجھ سے توقع کی جارہی ہے۔ واضح رہے کہ مارٹن گپٹل ورلڈ کپ کی پانچ اننگز میں دوہرے ہندسے تک بھی نہیں پہنچ سکے ہیں۔
