رانچی: جھارکھنڈ پردیش کانگریس کمیٹی کے صدر راجیش ٹھاکر نے کہا کہ مرکز کی مودی حکومت امیر کو امیر اور غریب کو غریب تر کر رہی ہے ۔ ٹھاکر نے آج یہاں پریس کانفرنس میں یہ بات کہی۔ وزیر اعظم مودی نے ایل پی جی سلنڈر سمیت تمام ضروری اشیاء کی قیمتوں میں بے تحاشہ اضافے کی وجہ سے عام لوگوں کی تکالیف کی کبھی پرواہ نہیں کی، لیکن برسوں بعد جب انتخابات قریب آئے انہوں نے عوام کے درد کو محسوس کیا اور قیمتوں میں کمی کی اور ایل پی جی سلنڈر 200 روپے سستا کردیا۔ 2014 سے کھانا پکانے والی گیس کی قیمت میں مسلسل اضافہ ہوا ہے اور پچھلے 09 سالوں میں یہ دگنی سے بھی زیادہ ہو چکی ہے اور 2020 سے بی جے پی حکومت نے سبسڈی دینا بھی بند کر دیا ہے ۔ پچھلی 02 دہائیوں میں ایل پی جی سلنڈر کی قیمتوں میں اضافے پر گہری نظر ڈالیں تو ہر ووٹر کی آنکھیں کھل جائیں گی اور ایک عام آدمی بھی صاف سمجھ سکتا ہے کہ قیمتوں میں صرف بی جے پی کے دور حکومت میں ہی بے رحمی سے اضافہ کیا گیا ہے ۔ گزشتہ ساڑھے 9 برسوں میں مودی سرکار نے کھانا پکانے کی گیس کی قیمتوں میں مسلسل اضافہ کرکے 31.37 کروڑ عوام کو لوٹا، انہوں نے عوام کی جیب سے 8 لاکھ 33 ہزار 640 کروڑ روپے سے زائد کی لوٹ کی۔ ایل پی جی سلنڈر کی قیمت میں 200 روپے کی کمی مودی حکومت کی طرف سے 5 ریاستوں کے آئندہ انتخابات اور پھر لوک سبھا انتخابات میں ووٹروں کو اپنی طرف متوجہ کرنے کا سیاسی حربہ ہے۔
