ملک میں تقریباً 35 کروڑ ترنگا جھنڈے فروخت ہونے کی توقع
نئی دہلی: کنفیڈریشن آف آل انڈیا ٹریڈرز کی جانب سے وزیر اعظم نریندر مودی کے ’ہر گھر ترنگا ابھیان‘ کو پورے ملک میں بہت جوش و خروش سے منانے کے لیے ملک بھر میں بڑے پیمانے پر کوششیں کی جارہی ہیں۔ اس مہم کی وجہ سے اس سال ملک بھر میں تقریباً 35 کروڑ ترنگا جھنڈے فروخت ہوں گے۔ اس سے تقریباً 600 کروڑ روپے کے کاروبار کا اندازہ لگایا گیا ہے۔ پچھلے سال یہ فروخت تقریباً 500 کروڑ روپے تھی۔ کنفیڈریشن نے ملک کے تمام تاجروں سے پرزور اپیل کی ہے کہ وہ 13 سے 15 اگست تک اپنی دکانوں اور گھروں پر قومی پرچم ضرور لگائیں اور اپنے ملازمین میں ترنگا جھنڈے بھی تقسیم کریں۔ سی اے ٹی کے قومی صدر بی۔ سی بھارتیہ اور قومی جنرل سکریٹری پروین کھنڈیلوال نے وزیر اعظم نریندر مودی سے اپیل کی ہے کہ وہ ترنگے کے تئیں لوگوں کے لگن اور جوش کو دیکھتے ہوئے 15 اگست 2023سے 15 اگست 2024 تک کی مدت کو “سوراج ورش” قرار دیں۔بھارتیہ اور کھنڈیلوال نے کہا ہے کہ 13 اگست سے 15 اگست تک CAT کے پرچم تلے ملک کی کاروباری تنظیمیں ملک بھر میں 4000 سے زیادہ ترنگا پروگرام منعقد کریں گی۔ ترنگا ریلیاں، ترنگا مارچ، ترنگا گورو یاترا اور سوراج مارچ جیسے پروگرام ہوں گے۔ اس مہم کی وجہ سے ملک بھر میں 10 لاکھ سے زیادہ لوگوں کو روزگار ملنے کی امید ہے۔ بی۔ سی بھارتیہ کا کہنا ہے کہ ہر گھر ترنگا ابھیان سے پہلے جھنڈوں کی فروخت 150تا200 کروڑ روپے تک محدود تھی۔