نئی دہلی۔11 جون ۔( سیاست ڈاٹ کام ) جل شکتی کے مرکزی وزیر گجیندر سنگھ شیخاوت نے کہا ہے کہ حکومت پانی کے تحفظ اور زیر زمین پانی کی سطح بڑھانے کے منصوبہ پر کام کر رہی ہے اور اگلے پانچ سال میں ہر گھر میں پینے کا صاف پانی پہنچانے کا نشانہ مقرر کیا گیا ہے ۔ جل شکتی کے وزیر گجیندرسنگھ شیخاوت نے ریاستوں کے پانی سے متعلق محکموں کے وزراء کی قومی کانفرنس سے خطاب کرنے کے بعد منگل کے روز یہاں پریس کانفرنس میں کہا کہ ملک میں اس وقت 18 فیصد گھروں تک پینے کا پانی دستیاب ہے اور حکومت 2024 تک ہر گھر پینے کا پانی فراہم کرنے کا ارادہ رکھتی ہے ۔ کانفرنس میں مغربی بنگال کا کوئی نمائندہ موجود نہیں تھا اور شیخاوت نے اسے بدقسمتی بتایا۔ انہوں نے کہا کہ کچھ ریاستوں نے لوگوں کو پینے کا پانی فراہم کرنے کے لئے اچھا کام کیا ہے اور وہاں 99 فیصد گھروں میں پینے کا پانی پہنچایا جا رہا ہے لیکن اتر پردیش، بہار، چھتیس گڑھ، جھارکھنڈ جیسی کئی ریاستیں ہیں جہاں صرف پانچ فیصد گھروں تک خالص پینے کا پانی دستیاب کرایا جا رہا ہے ۔
