دبئی۔ آسٹریلیا کے خلاف ناگپور میں کھیلے گئے پہلے ٹسٹ میں ہندوستان کی زبردست فتح نے انہیں چہارشنبہ کو آئی سی سی کی تازہ ترین ٹسٹ درجہ بندی میں پہلے مقام پر پہنچا دیا، جس سے وہ تینوں طرز کی کرکٹ میں نمبر ایک مقام کی ٹیم بن گئی ہے۔ ہندوستان نے جنوری میں نیوزی لینڈ کو 3-0 سے شکست دے کر اپنی نمبر ایک ٹی20 درجہ بندی کے ساتھ ونڈے میں بھی نمبر ایک ٹیم بن گئی تھی۔ روہت شرما کی قیادت والی ٹیم کو ٹسٹ رینکنگ میں سرفہرست رہنے کے لیے دہلی میں آسٹریلیا کے خلاف 16 فروری سے شروع ہونے والا دوسرا ٹسٹ جیتنا ہوگا اور جون میں ورلڈ ٹسٹ چمپیئن شپ کے فائنل کے لیے کوالیفائی کرنے کے لیے بھی ایک قدم آگے بڑھنا ہوگا۔ فائنل میں جگہ بنانے کے لیے انہیں سیریز 3-1 یا 3-0 سے جیتنا ہوگی۔ ہندوستان نے ناگپور میں آسٹریلیا کو ایک اننگز اور 132 رنز سے شکست دی اور اس جانب اہم پہلا قدم اٹھالیا ہے۔
