دوحہ ۔ 29جون (سیاست ڈاٹ کام ) پاکستان نے ایشین ٹیم اسنوکر چمپیئن شپ کے فائنل میں ہندوستان کو شکست دے کر چمپیئن بننے کا اعزاز حاصل کر لیا۔ قطر کے دارالحکومت دوحہ میں کھیلی گئی ایشین ٹیم اسنوکر چمپیئن شپ کے فائنل میں پاکستان کے بابر مسیح اور ذوالفقار قادر پر مشتمل ٹیم کا مقابلہ ہندوستان کے پنکج اڈوانی اور لکشمن راوت اور اور آدتیہ مہتا سے ہوا۔پہلے 2 فریمز میں پاکستانی کیوسٹس نے عمدہ کھیل پیش کیا جس کا اندازہ اس بات سے لگایا جا سکتا ہے کہ ان کے ہندوستانی حریف صرف ایک، ایک پوائنٹ ہی حاصل کر سکے اور انہوں نے 01-79 اور 01-71 سے فتح سمیٹی۔اس کے بعد ڈبلز مقابلے میں اڈوانی اور لکشمن راوت نے محتاط کھیل پیش کرتے ہوئے ڈبلز فریم 18-58 سے جیت لیا۔ ریورس سنگلز پر مشتمل چوتھے فریم میں پنکج اڈوانی پاکستان کے ذوالفقار قادر کے خلاف چھائے رہے اور فریم 39-67 سے جیت لیا۔ تاہم 0-2 کی برتری کے باوجود مجموعی طور پر مقابلہ برابر ہونے پر پاکستانی ٹیم شدید دباؤ کا شکار تھی اور آخری فریم میں پاکستان کے بابر مسیح کا مقابلہ لکشمن راوت سے ہوا جس میں سنسنی خیز مقابلے کے بعد بابر کامیاب رہے اور پاکستان نے 2-3 سے خطاب جیت کر چمپیئن بننے کا اعزاز حاصل کر لیا۔چمپیئن شپ میں پاکستان کی ٹیم گولڈ، ہندوستانی ٹیم کو سلور جبکہ برونزمیڈل مشترکہ طور پر میانمر اور تھائی لینڈ کی ٹیمیں جیتنے میں کامیاب رہیں۔
