اسلام آباد : ایک ہندوستانی آبدوز کو بحیرہ عرب میں پاکستانی سمندری حدود میں داخل ہونے سے روک دیا گیا ہے۔ اس واقعے کی تصدیق پاکستانی افواج کی جانب سے جاری کردہ ایک بیان میں کی گئی ہے۔ہندوستانی آبدوز کو پاکستانی سمندری حدود میں داخل ہونے سے روکنے کا واقعہ گزشتہ ویک اینڈ پر رونما ہوا۔ پاکستانی افواج کی جانب سے منگل 19اکتوبر کو جاری ہونے والے بیان میں بتایا گیا کہ اس آبدوز کی نشاندہی ہفتہ 16اکتوبر کو کی گئی تھی۔پاکستانی افواج کے بیان میں بتایا گیا کہ جب ہندوستان کی آبدوز یا سب میرین کی نشاندہی کر لی گئی تو ملکی بحریہ نے اس کو بحیرہ عرب میں پاکستان کی سمندر حدود میں داخل ہونے کی ممانعت کر دی۔ اس آبدوز کی نشاندہی پاکستانی بحریہ کے لانگ رینج سمندری گشتی یونٹ نے کی تھی۔ہندوستانی آبدوز کے حوالے سے پاکستانی فوج نے مزید کوئی تفصیل جاری نہیں کی۔ اسی طرح ابھی تک ہندوستان کی جانب سے بھی کوئی ردعمل سامنے نہیں آیا ہے۔پاکستانی فوج کے شعبہ تعلقات عامہ یا آئی ایس پی آر نے بھارتی آبدوز کی نشاندہی کو ملکی بحری فوج کی ان تھک نگرانی اور پیشہ ورانہ مہارت کا ایک شاندار نمونہ قرار دیا ہے۔اس بیان میں یہ بھی واضح کیا گیا کہ دونوں ملکوں کے موجودہ تعلقات اور سمندری سکیورٹی خدشات کے تناظر میں پاکستانی نیوی ملکی سمندری حدود کی نگرانی اور تحفظ کا سلسلہ ہمہ وقت جاری رکھے ہوئے ہے۔
