ممبئی۔ 3 جنوری (یو این آئی) ہندی سنیما میں نروپا رائے کو ایسی اداکارہ کے طور پر یاد کیا جاتا ہے کہ جنہوں نے اپنی بہترین اداکاری سے ماں کے کردار کو ایک نئی جہت ہی عطا نہیں کی بلکہ اپنی فطری اداکاری سے ماں کے کردارکو زندہ جاوید کردیا۔ نروپا رائے کااصلی نام کوکیلا تھا۔ ان کی پیدائش 4 جنوری 1931 کو گجرات کے بلساڑ میں ایک متوسط گھرانے میں ہوئی۔ ان کے والد ریلوے میں ملازم تھے ۔ نروپا رائے نے چوتھی جماعت تک تعلیم حاصل کی اور اس کے بعد ان کی شادی ممبئی میں کمل رائے سے ہوگئی۔ شادی کے بعد نروپا بھی ممبئی آگئیں۔ انہیں دنوں فلمساز و ہدایت کار بی ۔ایم۔ ویاس اپنی نئی فلم رنک دیوی کے لئے نئے چہروں کی تلاش میں تھے ۔ انہوں نے اپنی فلم کے لئے نئے اداکاروں کے لئے ایک اخبار میں اشتہار دیا۔ نروپا رائے کے خاوندفلموں کے بے حد شوقین تھے اور اداکار بننا چاہتے تھے ۔ کمل رائے اپنی بیوی کے ہمراہ بی ایم ویاس سے ملنے گئے اور اداکار بننے کی خواہش ظاہر کی لیکن بی ایم ویاس نے یہ کہہ کر صاف انکار کردیا کہ ان میں اداکار جیسی کوئی خصوصیت نہیں ہے ۔ لیکن اگر وہ چاہیں تو ان کی بیوی کو فلم میں اداکارہ کے طور پر کام مل سکتا ہے ۔ اسی طرح نروپا رائے 150 روپے ماہانہ پر کام کرنے لگی لیکن بعد میں انہیں اس فلم سے الگ کردیا گیا۔ بہرحال کافی جدوجہد کے بعد انہوں نے فلمی دنیا میں اپنے قدم جماہی لئے۔ فلم ’’دیوار‘‘ میں امیتابھ بچن اور ششی کپور کی ماں کے رول کے لئے انہیں ہمیشہ یاد کیا جائے گا۔