چنڈی گڑھ، 16 فروری (یو این آئی) پنجاب اسمبلی کے اسپیکر کلتار سنگھ سندھواں نے پیر کو مرکزی حکومت پر ہند-امریکہ تجارتی معاہدے کے ذریعے ملک کے کسانوں کو دھوکہ دینے کا الزام لگاتے ہوئے کہا کہ یہ معاہدہ ہندوستان کے کسانوں کے لیے انتہائی نقصان دہ ثابت ہوگا۔ انہوں نے کہا کہ یہ معاہدہ نہ صرف ہمارے کسانوں کو تباہ کرے گا بلکہ ان کے مفادات کو بھی نقصان پہنچائے گا۔مرکزی حکومت کے فیصلے کی سخت مذمت کرتے ہوئے مسٹر سندھواں نے کہا کہ بی جے پی حکومت ہمارے کسانوں کو مسلسل گمراہ کر رہی ہے ۔ ان کا کہنا تھا کہ مناسب قیمتوں، سبسڈیز، بنیادی ڈھانچے اور خطرے سے تحفظ جیسی مضبوط گھریلو حمایت کے بغیر، غیر ملکی تجارت کے لیے ہندوستانی منڈی کو کھولنے کا یہ اقدام چھوٹے اور معمولی کسانوں کے لیے اہم مشکلات کا باعث بن سکتا ہے ۔
