غزہ : اسرائیل نے حماس لیڈر یحییٰ سنوار کو ہلاک کر کے گروپ کو ایک بڑا دھچکا پہنچانے کے بعد غزہ پر شدید حملے کیے۔ رپورٹ کے مطابق سنوار کی ہلاکت سے غزہ پر اسرائیلی حملوں کا سلسلہ ختم نہیں ہوا۔ جمعرات اور جمعے کو علی الصبح متعدد حملوں نے علاقے کو ہلا کر رکھ دیا۔ امدادی کارکنوں نے شمال میں ایک گھر پر حملے کے بعد ملبے سے تین فلسطینی بچوں کی لاشیں نکالیں۔اسرائیلی فوج نے کہا کہ وہ جبالیہ میں اپنی کارروائی آگے بڑھا رہی ہے، یہاں حملوں میں 14 افراد ہلاک ہوئے ۔ایک اندازے کے مطابق اس موسم سرما میں غزہ کے لگ بھگ 3لاکھ 45 ہزار شہریوں کو خوفناک بھوک کا سامنا ہورہا ہے۔اسرائیلی فوج کے سربراہ ہرزی حلیوی نے کہاکہ لڑائی اس وقت تک جاری رہے گی جب تک 7 اکتوبر کے قتل عام میں ملوث تمام دہشت گردوں کو پکڑ نہیں لیتے اور تمام یرغمالوں کو گھر واپس نہیں لے آتے۔ اسرائیل نے جنوبی لبنان کے شہر طائرے میں حملے کیے ۔ اسرائیلی فوج نے کہا کہ جنوبی لبنان میں لڑائی میں پانچ فوجی ہلاک ہوئے جس کے بعد اسرائیلی فوجیوں کی معلنہ اموات کی تعداد 19 ہو گئی ہے۔
