لکھنؤ 24 اکتوبر (یو این آئی) سماج وادی پارٹی کے صدر اکھلیش یادو نے جمعہ کو کہا کہ بھارتیہ جنتا پارٹی کا کوئی ڈبل انجن نہیں بلکہ جھوٹ کا انجن چل رہا ہے اور یہ جھوٹ کا انجن راجستھان میں بھی کام کر رہا ہے ۔ راجستھان کے اجمیر میں مختلف پروگراموں میں شرکت کے بعد صحافیوں سے بات کرتے ہوئے انہوں نے کہا کہ بھارتیہ جنتا پارٹی نے دہلی اور راجستھان کیلئے الگ الگ منشور جاری کیے تھے ، لیکن اقتدار میں آنے کے بعد کسی پر عمل نہیں کیا۔ اکھلیش یادو نے الزام لگایا کہ بھارتیہ جنتا پارٹی کی حکومتیں صرف جھوٹے وعدے کرتی ہیں اور عوام کو گمراہ کرتی ہیں۔ کسانوں کی مشکلات پر بات کرتے ہوئے انہوں نے کہا کہ “بھارتیہ جنتا پارٹی کی حکومت نے کسانوں کی آمدنی دوگنی کرنے کا وعدہ کیا تھا، لیکن یہ وعدہ آج تک پورا نہیں ہوا۔ حکومت کسانوں کی زمین اور محنت چھین کر بڑے صنعتکاروں کو دے رہی ہے ۔ اتر پردیش کی سیاست پر بات کرتے ہوئے اکھلیش یادو نے کہا کہ صوبے کی عوام بھارتیہ جنتا پارٹی کی چالوں سے تنگ آ چکے ہیں اور اب تبدیلی چاہتے ہیں۔ انہوں نے یقین ظاہر کیا کہ 2027 میں اتر پردیش میں سماج وادی پارٹی کی حکومت بنے گی۔ بہار اسمبلی انتخابات کے بارے میں پوچھے گئے سوال پر انہوں نے تیجسوی یادو کو وزیر اعلیٰ کے امیدوار کے طور پر نامزد کرنے پر انڈیا اتحاد، کانگریس اور دیگر اتحادی جماعتوں کو مبارکباد دی اور کہا کہ ہمیں پورا یقین ہے کہ بہار کی عوام تیجسوی یادو اور انڈیا اتحاد کو ترقی اور نوجوانوں کے بہتر مستقبل کیلئے موقع دیں گے ۔
